సొంతంగా ట్రాక్టర్ నడుపుతూ ఇంటింటికీ నీటి సరఫరా..
పాలకుర్తి ప్రజాప్రతినిధుల అరుదైన దృశ్యం!
పదవులు ఉన్నాయి కదా అని కుర్చీలకో పరిమితం కాలేదు ఆ ప్రజాప్రతినిధులు. గ్రామంలో సమస్య వచ్చిందని తెలియగానే తామే స్వయంగా రంగంలోకి దిగారు. ‘మేము ప్రజల సేవకులం’ అని మాటల్లోనే కాదు.. చేతల్లోనూ నిరూపించి అందరితో “శభాష్” అనిపించుకున్నారు పాలకుర్తి గ్రామ సర్పంచ్ కమ్మగాని విజయ నాగన్న గౌడ్, ఉప సర్పంచ్ గాదెపాక కిరణ్, వార్డు సభ్యులు మామిండ్ల కవిత శోభన్ బాబు, కమ్మగాని శ్రీకాంత్, ఎలమకంటి స్వప్న సతీష్ తదితరులు. సాధారణంగా గ్రామాల్లో ప్రతిరోజూ ఇంటింటికీ నీటి సరఫరా చేయడం గ్రామపంచాయతీ సిబ్బంది బాధ్యత. అయితే, ఈరోజు అనూహ్యంగా గ్రామపంచాయతీ సిబ్బందితో పాటు ట్రాక్టర్ డ్రైవర్లు కూడా సెలవు పెట్టారు. ఎండ తీవ్రత ఎక్కువగా ఉన్న ఈ రోజుల్లో ఒక్కరోజు నీళ్లు రాకపోయినా ప్రజలు తీవ్ర ఇబ్బందులు పడతారని ఆ ప్రజాప్రతినిధులు భావించారు. సిబ్బంది లేరని చేతులు ముడుచుకుని కూర్చోకుండా.. తామే స్వయంగా బాధ్యతను భుజానికెత్తుకున్నారు. పదవి ముఖ్యం కాదు.. ప్రజల అవసరమే ముఖ్యమని వార్డు సభ్యులు మామిండ్ల కవిత శోభన్ బాబు స్వయంగా ట్రాక్టర్ స్టీరింగ్ పట్టి, వాహనాన్ని నడుపుకుంటూ గ్రామ వీధుల్లోకి వెళ్లారు. సర్పంచ్ కమ్మగాని విజయ నాగన్న గౌడ్, ఉపసర్పంచ్ గాదెపాక కిరణ్, వార్డు మెంబర్లు కలిసి గ్రామంలోని సిద్ధార్థ నగర్, టెంపుల్ కాలనీలో ప్రతి ఇంటికీ వెళ్తూ, ప్రజలకు తాగునీటిని అందించారు. ఒక పక్క ఎండ మండిపోతున్నా లెక్కచేయకుండా, వీధి వీధినా తిరుగుతూ గ్రామస్థుల నీటి అవసరాలను తీర్చారు. ప్రజాప్రతినిధులే నేరుగా ట్రాక్టర్ వేసుకుని వచ్చి నీళ్లు పోస్తుండటంతో పాలకుర్తి గ్రామస్థులు ఆశ్చర్యంతో పాటు ఆనందాన్ని వ్యక్తం చేశారు.
అధికారం చేతిలో ఉందని అహంకారం ప్రదర్శించకుండా, అత్యవసర సమయంలో తాము కూడా సాధారణ కార్మికుల్లా మారి సేవ చేసిన ఈ ఇద్దరు నాయకుల చొరవ ఇప్పుడు నియోజకవర్గంలో హాట్ టాపిక్‌గా మారింది. సోషల్ మీడియాలో కూడా వీరు ట్రాక్టర్ నడుపుతూ నీళ్లు పోస్తున్న విజువల్స్ వైరల్ అవుతున్నాయి. సమస్య వచ్చినప్పుడు సాకులు వెతకడం కాదు.. ఇలా పరిష్కారం చూపించే నాయకులే మాకు కావాలి అంటూ పాలకుర్తి ప్రజలు తమ సర్పంచ్, ఉప సర్పంచ్, వార్డు మెంబర్లపై ప్రశంసల వర్షం కురిపిస్తున్నారు. నిజమైన ప్రజాసేవకులకు ఈ ఘటన ఒక అద్దం పడుతోంది.
