ట్రాఫిక్ కట్టాలు లేందెక్కడ? కిరాణా దుకాన్ల, రేషన్ షాపుల్ల, బ్యాంకుల్ల, బస్సుల్ల, రోడ్ల మీద, శివరాకరికి సులభ్ కాంప్లెక్సుల్ల కూడా రద్దేనాయె!? కానీ, గీ కర్ణాటకల రద్దీకి కర్ణునికి ఏదో లింకుందట సూద్దాం పదండ్రి!
కర్ణాటకల ‘రెండు కిలోమీటర్లకు గంటపైనే పట్టింద’నడం, ‘వర్క్ ఫ్రం ఆఫీస్’ అనేకంటే ‘వర్క్ ఫ్రం ట్రాఫిక్’ అనడం మామూలేనట. పూర్వం రోజుల్ల కర్ణుడంతటి వాడికి కూడా గీడ ట్రాఫిక్ కట్టాలు తప్పలేదట!
యెన్కటికి చోళరాజ్యానికి దగ్గర్ల అంటే గిప్పుడు గీ బెంగుళూరుకు దగ్గర్ల కర్ణుడు-అర్జనుడికి యుద్ధం జరిగిందట. ఇగ రెండు జంక్షన్ల అవతల ఉన్న అర్జనుడ్ని సూర్యాస్తమయంలోపే ఖతం చేస్తనని కర్ణుడు ప్రతిన బూనిండట. గట్లనే యుద్ధానికి బయల్దేరిండంట. ఇగ రథం ఎంతకూ ముందుకు కదుల్తలేదట. ఎందుకుని శల్యుడిని అడిండట. ఇది పీకవర్, దేవుళ్లు గూడా గీ రూట్ల రావడానికి భయపడ్తరన్నడట. సూర్యాస్తమయం కావస్తున్నా, కర్ణుడు అర్జనుడిని చేరుకోలేదట. ఈలోగా గా కర్ణుడి రథం రోడ్డుమీదే ఉన్న పెద్ద గుంటల పడిపోయిందట. ఎంతకూ గా రథం కదలకపోవడంతోటి కర్ణుడు, ‘గీ నేల మీద ఏ చక్రం కూడా సాఫీగా తిరగొద్ద’ని శపించిండంట. ఎక్కడైతే కర్ణుడు ఆటకాయించబడిండో.. గదే గా ‘కర్ణా-అటకా’ గా మారిందంట!?
కర్ణాటక ట్రాఫిక్ రద్దీ మీద ఎవలో గిట్ల ఓ సెటైర్ రాసి, సొషల్ మీడియల పెట్టిండు. గదిప్పుడు తెగ శెక్కర్లు కొడ్తాంది. మస్తు లైకులు, షేర్లు కొట్టుకుంటాంది.
