తొలి అరంగేట్రంతో కళా ప్రపంచంలో కొత్త వెలుగు
అడుగు డిజిటల్ మీడియా స్పెషల్ స్టోరీ
జనగామ, జనవరి 03 (అడుగు న్యూస్):
పాలకుర్తి మండలం గూడూరు గ్రామానికి చెందిన ప్రముఖ గ్రామీణ వైద్యులు కీ. శే వైట్ల లక్ష్మీపతి మనుమరాలు స్నిషిక వైట్ల చిన్న వయసులోనే కూచిపూడి నాట్యంలో విశేష ప్రతిభను కనబరుస్తూ ప్రత్యేక గుర్తింపు తెచ్చుకుంటోంది. 04-05-2013న జన్మించిన స్నిషిక ప్రస్తుతం 8వ తరగతి చదువుతోంది. చదువుతో పాటు కళను సమన్వయం చేస్తూ 80%కు పైగా మార్కులు సాధించడం ఆమె ప్రత్యేకత. గత ఐదేళ్లుగా కూచిపూడి నాట్యాన్ని అభ్యసిస్తూ వస్తున్న స్నిషికకు సూర్యదేవర సింధూజ గురువుగా, అయ్యప్ప టెంపుల్ బాగ్ అంబర్పేట్లోని సింజిని ఆర్ట్స్ సంస్థలో శిక్షణ అందిస్తున్నారు. కఠినమైన సాధన, శాస్త్రీయ నృత్యంలోని భావప్రకటన, లయ, హావభావాలపై పట్టు ఆమెను ముందుకు నడిపిస్తోంది.
ఇప్పటి వరకు పుట్టపర్తి సత్యసాయి ట్రస్టు కేంద్రం, రవీంద్రభారతి, శివమ్ టెంపుల్–శివమ్ రోడ్, సత్యసాయి నిగమాగమం, శ్రీ సత్యసాయి విద్యా నిహార్ హై స్కూల్ (డీడీ కాలనీ) వంటి ప్రముఖ వేదికలపై మొత్తం ఐదు స్టేజ్ ప్రోగ్రామ్స్లో నాట్యం చేసి ప్రేక్షకుల మనసులు గెలుచుకుంది. ప్రత్యేకంగా పుట్టపర్తి సత్యసాయి ట్రస్ట్ ఆధ్వర్యంలో కుర్వంత్ హాల్లో నాలుగు వేల మందికి పైగా ప్రేక్షకుల ముందే ప్రదర్శన ఇవ్వడం ఆమె ఆత్మవిశ్వాసానికి నిదర్శనం. 2025 సంవత్సరం ఆగస్టు 9న రాఖీ పౌర్ణమి రోజున ఆమె తొలి అరంగేట్రం జరగడం కళా జీవితంలో మైలురాయిగా నిలిచింది.
స్నిషిక తల్లి తండ్రులు శ్రీనివాస్ వైట్ల, సౌజన్య వైట్లలు కుమార్తె ప్రతిభను ప్రోత్సహిస్తూ అన్ని విధాలా సహకారం అందిస్తున్నారు. నానమ్మ రామలక్ష్మీ ఆమె కళా ప్రయాణానికి పూర్తి చేదోడు వాదోడుగా ఉంటూ… ఆశీర్వాదంగా నిలుస్తున్నారు. తమ్ముడు క్రితిన్ వైట్ల (3వ తరగతి) కూడా అక్కను ఆదర్శంగా తీసుకుంటూ కరాటే లో శిక్షణ తీసుకుంటూ… ముందుకు సాగుతున్నాడు. స్నిషిక భవిష్యత్ లక్ష్యం స్వంత డాన్స్ ఇన్స్టిట్యూట్ను స్థాపించి శాస్త్రీయ నాట్యాన్ని మరింత విస్తరించడమే. గ్రామీణ ప్రాంతాల నుంచి కూడా అంతర్జాతీయ స్థాయిలో కళాకారులు ఎదగగలరని ఆమె ప్రయాణం నిరూపిస్తోంది. సాధన, క్రమశిక్షణ, కుటుంబ మద్దతుతో పాటు గురువు మార్గదర్శకత్వం కలిసినప్పుడు చిన్న వయసులోనే పెద్ద విజయాలు సాధించవచ్చని స్నిషిక వైట్ల కథ చెబుతోంది.
