కొండా ఫ్యామిలీ@వివాదాలు
ఎందులోనూ ఇమడరు
మరెందులోనూ పొసగరు
ఎవరినీ అంగీకరించరు
వారెవరికీ అంగీకారంగా ఉండరు
వారిది ఇష్టానుసారం..
వారికి లేదు అధిష్ఠానం..
లేనేలేదు విచారం! కొండంత ప్రచారం
సొంత నియోజవర్గంలోనూ పార్టీ నేతలు,
కార్యకర్తలతో విభేదాలు, కేసులు
రాష్ట్ర రాజకీయాల్లో ‘అమ్మ! నాన్న!! ఓ కూతురు!!!’ వివాదాలకు ఆ ఫ్యామిలీ కేరాఫ్ అడ్రస్. వాళ్ళ రూటే సెపరేటు? ఎందులోనూ ఇమడరు. మరెందులోనూ పొసగరు. ఎవరినీ అంగీకరించరు. వారెవరికీ అంగీకారంగా ఉండరు. వారిది ఇష్టానుసారం..వారికి లేనేలేదు అధిష్ఠానం..లేదు ఏ మాత్రం విచారం! కొండంత ప్రచారం!! సొంత నియోజవర్గంలోనూ పార్టీ నేతలు, కార్యకర్తలతో విభేదాలు, కేసులు..ఆ కుటుంబంతో పరిచయం అక్కరలేదు. ఆ కుటుంబ వివాదాలే వారిని అందరికీ చేరువ చేశాయి. ఇంతకూ అర్థమై ఉంటుంది. అది కొండా ఫ్యామిలీ అని.
అవును వారికి కోపమస్తే ఎదుటి వారు ఎవరని చూడరు. అవతలి వ్యక్తి స్థాయిని, హోదాను గుర్తించరు. యాస, ప్రాసలతో బూతుల తిడతారు. వారు తిడితే ఎంతటి వారైనా ఆ మాటలు పడాల్సిందే. తెలంగాణ రాష్ట్ర మంత్రివర్గంలో కీలక భూమిక పోషిస్తున్న మంత్రి కొండా సురేఖ, ఆమె భర్త మాజీ ఎమ్మెల్సీ కొండా మురళీధర్ రావు, కొండా దంపతుల గారాలపట్టి కొండా సుస్మిత పటేల్. ఈ ముగ్గురులో ఎవరైనా సరే, తెలంగాణ రాష్ట్రంలో రాజేసిన మాటల మంటలను చల్లార్చడం అగ్నిమాపక శకటాలతో కాదు కదా? కాంగ్రెస్ అధిష్టానంతోనూ కావట్లేదు.
రాష్ట్ర దేవాదాయ, అటవీ శాఖ మంత్రి కొండ సురేఖ మాట్లాడితే చాలు, పత్రికలు మీడియా కు ఆ వ్యాఖ్యలు పతాక శీర్షికన చేరుతాయి. అంత పవర్ ఫుల్ గా ఆమె మాటలు ఉంటాయి. భారత నేత మాజీ మంత్రి కేటీఆర్ పై మాట్లాడినా.. సినీనటి సమంత గురించి మాట్లాడినా, హీరో నాగార్జునతో కేసు నెదుర్కొన్నా, చివరకు సారీ చెప్పినా, చాలా మంది మంత్రులకు డబ్బులు ఇవ్వడానికి వస్తూంటారు. అందులోంచి తాను తీసుకోకుండా నియోజకవర్గంలో ప్రగతికి వాడామన్నా, ఆ మాటలు మంటలు దావానలంలా వ్యాపించి రచ్చ రచ్చ అయిన సంగతి తెలిసిందే.
తెలంగాణ రాష్ట్ర ప్రభుత్వంలో మంత్రులు ఏ ఫైలు పై సంతకం చేసిన డబ్బులు తీసుకుంటారని స్వయంగా కాంగ్రెస్ ప్రభుత్వంలో మంత్రిగా ఉన్న కొండా సురేఖ చేసిన వ్యాఖ్యలు పెద్ద దుమారాన్ని రేపాయి. మంత్రి కొండా సురేఖ ఏది మాట్లాడినా వివాదం కావడం ఆ తర్వాత మళ్లీ సర్దుకునే ప్రయత్నం చేయడం రివాజుగా వస్తుంది..
మంత్రి సురేఖ భర్త, మాజీ ఎమ్మెల్సీ కొండా మురళీధర్ రావు. ఈయన ఈ అప్పట్లో మాట్లాడిన మాటలు పెద్ద వివాదానికి దారితీసాయి. 2023 ఎన్నికల్లో కొండా సురేఖ గెలుపు కోసం రూ. 70 కోట్లు ఖర్చు చేశానని మురళీధర్ రావు బహిరంగ వ్యాఖ్యానించడం పెను సంచలనంగా మారింది.
కొండా దంపతుల ముద్దుల కూతురు కొండా సుష్మితా పటేల్ ముఖ్యమంత్రి రేవంత్ రెడ్డి పై గతంలో ఓఎస్డీ సుమంత్ ను తొలగించి, అరెస్టు చేసేందుకు పోలీసులు ప్రయత్నించిన సమయంలో, సుమంత్ ను కాపాడుతూ, చేసిన వ్యాఖ్యలు రాజకీయ ప్రకంపనాలకు దారితీసాయి. కాంగ్రెస్, సీఎం ప్రతిష్టను దిగజార్చాయి. మంత్రి సురేఖ స్పందించి తన కూతుర్ని వెంట తీసుకెళ్లి ముఖ్యమంత్రితో గతంలో చేసిన రాజీ ఫలించడంతో రాజకీయ వాతావరణం చల్లబడింది. ఇటీవల మంత్రి కొండా సురేఖ జన్మదిన వేడుకలు సందర్భంగా గీసుగొండలో మంత్రి కూతురు సుస్మిత పటేల్ ముఖ్యమంత్రిపై మరోసారి మాట్లాడడం వివాదాలకు దారి తీసింది. నేరుగా సీఎంను ముఖ్యమంత్రి కాగానే కళ్ళు నెత్తికెక్కాయా? మా నాన్నకు ఇస్తానన్న ఎమ్మెల్సీ ఏమైంది? నీ కుటుంబం అవినీతిని బయట పెడతానంటూ చేసిన వ్యాఖ్యలు సీఎం, కాంగ్రెస్ ఇమేజీనీ డ్యామేజీ చేయడంతోపాట, రాష్ట్ర రాజకీయాల్లో పెను సంచలనంగా మారింది. అంతేగాక పరకాల నాదే, వచ్చే ఎన్నికల్లో పోటీ చేస్తా? అక్కడి సీనియర్ ఎమ్మెల్యే రేవూరి ప్రకాశ్ రెడ్డిని డైపర్లేసుకునే తిరిగేవాడు ఎమ్మెల్యేనా? అంటూ తూలనాడారు. దీంతో కాంగ్రెస్ ఎమ్మెల్సీలు, ఎమ్మెల్యేలు, పార్టీ నాయకులు సుస్మితపై ప్రెస్ మీట్ లు పెట్టి మరి ప్రతి దాడికి దిగారు. సుస్మిత విమర్శల తర్వాత కాంగ్రెస్ అధిష్టానం స్పందించి క్రమశిక్షణ కమిటీ ద్వారా మంత్రి సురేఖకు నోటీసు ఇవ్వడం.. బదులుగా మంత్రి తన కూతురు చేసి వ్యాఖ్యలకు తనకు సంబంధమే లేదంటూ జవాబు ఇవ్వడం పరిస్థితి మరింత వేడెక్కేలా చేసింది. పీసీసీ క్రమశిక్షణ కమిటీ మంత్రి సురేఖకు మరోసారి నోటీసు ఇవ్వడంతో వివాదం మరింత వేడెక్కింది.
మంత్రి సురేఖ ఓ వైపు రాజకీయంగా పరిస్థితులను ఎదుర్కొంటూనే, మరోవైపు సీఎం సతీమణిని, ఏఐసీసీ అధ్యక్షులు మల్లికార్జుణ ఖర్గేను కలవడం, హైదరాబాద్ లో రాష్ట్ర ఉప ముఖ్యమంత్రి బట్టి విక్రమార్కను మంత్రి భర్త కొండ మురళీధర్ రావు కలవడం, తాజాగా రాఖీ పండుగ రోజు ముఖ్యమంత్రి రేవంత్ రెడ్డి ఇంటికి వెళ్లి మంత్రి సురేఖ రేవంత్ కు రాఖీ కట్టడంతో, ‘రాఖీ.. రాజీ’ రాజకీయంపై చర్చ మొదలైంది.. ఇంత జరుగుతున్నా, తన కూతురు సుస్మిత వ్యాఖ్యలపై సురేఖ విచారం కూడా వ్యక్తం చేయకపోవడం విచిత్రమే.
అయితే, కొండా మురళీధర్ రావు మాత్రం, తన కూతురు ప్లాన్ ఎ అమలు చేసిందని, తర్వాత ప్లాన్ బీ ఏంటో తనకు తెలియదని చెప్పండం ఒక హెచ్చరికతో కూడి బెదిరింపులాగే భావించాల్సి వస్తుంది. అదీగాక తనకు మంత్రి స్థాయి సెక్యూరిటీని వినియోగించుకోవడం కూడా వాదాస్పదమైంది. ఏసీపీ, సీఐల స్థాయి పోలీసు ఉన్నాధికారుల స్పెన్షన్ కు దారితీసింది. మరోవైపు నియోజకవర్గంలోనూ అంతర్గతంగా పార్టీ నేతలు, కార్యకర్తలతోనూ విభేదాలున్నాయి. పైగా కొందరిపై కేసులు కూడా నమోదయ్యాయి.
రేవంత్ కు రాఖీ కట్టిన తర్వాత పరిస్థితి ఏమైనా మార్పు వస్తుందా? అధిష్టానం ఢిల్లీకి ముఖ్యమంత్రిని మంత్రి సురేఖని పిలిచి చర్చలు జరిపి రాజీ చేస్తారా? అనే విషయంపై తెలంగాణ రాష్ట్రంలో గుసగుసలు వినిపిస్తున్నాయి. ఇలా పలుమార్లు సొంత ప్రభుత్వంపై మంత్రి కొండా సురేఖ కుటుంబ సభ్యులు తరచూ వివాదాస్పద వ్యాఖ్యలు చేయడం ఆ తర్వాత మళ్లీ సర్దుకునే ప్రయత్నం చేయడం చూస్తున్న ప్రజలకు విసిగెత్తుతోంది. కాంగ్రెస్ కల్చరే అంత అనే అభిప్రాయం బలపడుతోంది. మంత్రి కొండ సురేఖ పదవి పోతుందని ఓవైపు స్వపక్షంలోనూ, విపక్షంలోనూ చర్చ జరుగుతోంది. ఆ అవకాశమేలేదని మరో చర్చ తెరమీద ఆడుతోంది. వారేపార్టీలో ఉన్నా, ఎన్ని పార్టీలు మారినా, రాజీలేని కొండా రాజకీయాలకు తెరపడుతుందా? లేక రాజీ కుదురుతుందా? ఆ ఆలస్యం దేనికి సంకేతం? కాలమే నిర్ణయిస్తుంది.
