మెల్బోర్న్ క్రికెట్ గ్రౌండ్ వేదికగా భారత్-ఆస్ట్రేలియా మధ్య నాలుగో టెస్టు ఉత్కంఠభరితంగా సాగుతోంది. నాలుగో రోజు ఆట ముగిసే సమయానికి ఆస్ట్రేలియా 9 వికెట్లకు 228 పరుగులు చేసింది. క్రీజ్లో నాథన్ లియోన్ (41 నాటౌట్) మరియు స్కాట్ బోలాండ్ (10 నాటౌట్) నిలకడగా నిలిచారు. ఆసీస్ ప్రస్తుతం 333 పరుగుల భారీ ఆధిక్యంలో ఉంది. టెయిలాండర్లు లియోన్, బోలాండ్ పదో వికెట్కు 55 పరుగుల కీలక భాగస్వామ్యాన్ని నెలకొల్పి, భారత బౌలర్లను పరీక్షించారు.
ఆస్ట్రేలియా భారత్కు 333 నుంచి 350 పరుగుల మధ్య లక్ష్యాన్ని నిర్దేశించే అవకాశముంది. మెల్బోర్న్ వేదికపై ఇంతకుముందు అత్యధిక ఛేజ్ 322 పరుగులుగా ఉంది. 1928లో ఇంగ్లండ్ ఈ ఫీట్ సాధించింది. ఇప్పటివరకు 300కి పైగా పరుగులు ఛేజ్ చేసిన జట్టు మరెవరూ లేరు. భారత్ ఈ లక్ష్యాన్ని చేధిస్తే చరిత్ర తిరగరాసినట్టే.
భారత జట్టు గతంలో మెల్బోర్న్లో లక్ష్యాన్ని చేధించడం అరుదైనదే. 2020లో కేవలం 70 పరుగుల లక్ష్యాన్ని మాత్రమే ఛేజ్ చేయగలిగింది. అయితే, 2018/19 పర్యటనలో ఇదే వేదికపై భారత్ 137 పరుగుల తేడాతో అద్భుత విజయం సాధించింది. ఆ మ్యాచ్లో జస్ప్రిత్ బుమ్రా 9 వికెట్లతో సత్తా చాటాడు. మరోవైపు, ఆస్ట్రేలియాలో భారత్ అత్యధిక టెస్టు ఛేజింగ్ 329 పరుగులుగా ఉంది. 2021లో బ్రిస్బేన్ వేదికగా టీమిండియా ఈ ఘనత సాధించింది.
ప్రస్తుతం ఆసీస్ ఆధిక్యంలో ఉన్నప్పటికీ, టీమిండియాకు చరిత్ర సృష్టించే అవకాశం లభించింది. ఈ ఛేజ్ను పూర్తి చేస్తే, 96 ఏళ్ల పురాతన రికార్డును బద్దలుకొడుతుంది.
