ప్రముఖ సినీ నటుడు, దర్శకుడు నానా పటేకర్ (75) గురువారం ఉదయం కన్నుమూశారు. గోవాలోని తన నివాసంలో అపస్మారక స్థితిలో కనిపించిన ఆయనను కుటుంబ సభ్యులు వెంటనే సమీపంలోని దవాఖానకి తరలించారు. అయితే అప్పటికే ఆయన పరిస్థితి విషమంగా ఉండటంతో వైద్యులు మృతి చెందినట్లు ప్రకటించారు. తీవ్రమైన గుండెపోటుతో ఆయన మరణించినట్లు దవాఖాన వర్గాలు వెల్లడించాయి. వైద్యులు దాదాపు 45 నిమిషాల పాటు సీపీఆర్ చేసినప్పటికీ స్పందన లేకపోయిందని తెలిపారు. ఈ ఘటనపై మెడికో-లీగల్ కేసు నమోదు కాగా, పోస్టుమార్టం అనంతరం మరిన్ని వివరాలు వెల్లడయ్యే అవకాశం ఉంది.
నానా పటేకర్ అసలు పేరు విశ్వనాథ్ పటేకర్. 1951లో జన్మించిన ఆయన 1978లో ‘గమన్’ సినిమాతో సినీ రంగ ప్రవేశం చేశారు. హిందీ, మరాఠీ చిత్రాల్లో తన విలక్షణ నటన, శక్తివంతమైన సంభాషణలతో ప్రత్యేక గుర్తింపు తెచ్చుకున్నారు. ‘పరిందా’, ‘క్రాంతివీర్’, ‘ప్రహార్’, ‘అబ్ తక్ ఛప్పన్’, ‘వెల్‌కమ్’, ‘నటసమ్రాట్’ వంటి చిత్రాల్లో ఆయన పోషించిన పాత్రలు ప్రేక్షకులపై చెరగని ముద్ర వేశాయి. ‘పరిందా’ చిత్రంలోని నటనకు 1989లో ఉత్తమ సహాయ నటుడిగా జాతీయ అవార్డు అందుకున్నారు.
తెలుగు ప్రేక్షకులకు కూడా నానా పటేకర్ సుపరిచితమే. రజనీకాంత్ నటించిన ‘కాలా’లో ప్రతినాయకుడిగా మెప్పించారు. అలాగే తమిళ చిత్రం ‘బొమ్మలాట్టమ్’ తెలుగులో ‘రాణా’ పేరుతో విడుదల కాగా, ఇందులో అర్జున్, కాజల్ అగర్వాల్‌తో కలిసి కీలక పాత్ర పోషించారు.
సినీ రంగానికి చేసిన సేవలకు గుర్తింపుగా 2013లో కేంద్ర ప్రభుత్వం నానా పటేకర్‌ను పద్మశ్రీతో సత్కరించింది. అదే ఏడాది మహారాష్ట్ర ప్రభుత్వం రాజ్‌కపూర్ ప్రత్యేక సహకార అవార్డును అందించింది. ఆయన మరణంతో భారతీయ సినీ పరిశ్రమలో విషాదం నెలకొంది.
