ఒకప్పుడు కోట్లు కురిపించిన రియల్ ఎస్టేట్ రంగం ఇప్పుడు కొనుగోలుదారుల కోసం ఎదురుచూస్తోంది! హైదరాబాద్ మార్కెట్లో తగ్గుతున్న రిజిస్ట్రేషన్లు, మందగించిన క్రయవిక్రయాలు రంగం భవిష్యత్తుపై ప్రశ్నలు రేకెత్తిస్తున్నాయి. లగ్జరీ ఇళ్లకు కొంత డిమాండ్ ఉన్నా.. మధ్యతరగతి సొంతింటి కల మాత్రం ధరల భారంతో దూరమవుతోంది. ఈ స్తబ్ధతకు తెరపడేదెప్పుడు? రియల్ రంగానికి పునరుత్తేజం వచ్చేదెలా?
మార్గం – అడుగు, ఎడిటోరియల్
తెలంగాణ ఆర్థిక వ్యవస్థకు అత్యంత కీలకమైన ఇంజిన్లలో ఒకటైన రియల్ ఎస్టేట్ రంగం ప్రస్తుతం ఆందోళనకరమైన మందగమనాన్ని ఎదుర్కొంటోంది. దశాబ్దానికి పైగా నిరంతర వృద్ధిని చూసిన ఈ రంగంలో, గత కొద్ది నెలలుగా అమ్మకాలు, కొనుగోళ్లు నిలిచిపోయినట్లుగా కనిపిస్తుండటం విశ్లేషకులను సైతం ఆశ్చర్యానికి గురిచేస్తోంది. ప్రముఖ సంస్థ ‘నైట్ ఫ్రాంక్ ఇండియా’ విడుదల చేసిన తాజా గణాంకాల ప్రకారం, సెప్టెంబర్ 2026 నాటికి హైదరాబాద్ మార్కెట్లో రిజిస్ట్రేషన్ల సంఖ్య 15 శాతం తగ్గి 5,620 యూనిట్లకు పడిపోవడం గమనార్హం. లావాదేవీల విలువ సైతం రూ.4,804 కోట్ల నుంచి రూ.4,487 కోట్లకు క్షీణించింది. ఆగస్టు నెలతో పోల్చినా మరో 5 శాతం క్షీణత నమోదు కావడం మార్కెట్‌లోని ఒత్తిడి తీవ్రతను తేటతెల్లం చేస్తోంది. గృహ నిర్మాణ రంగం కేవలం స్థిరాస్తుల కొనుగోళ్లకే పరిమితం కాకుండా సిమెంట్, స్టీల్, భవన నిర్మాణ కార్మికుల వంటి వందలాది అనుబంధ రంగాల జీవనాధారంగా ఉండటంతో, ఈ సంక్షోభం రాష్ట్ర సమగ్ర ఆర్థిక స్థితిగతులపై ప్రతికూల ప్రభావాన్ని చూపే ప్రమాదం ఏర్పడింది.
ఈ క్షీణతలో అత్యంత ఆందోళనకరమైన అంశం ఏమిటంటే.. సామాన్య, మధ్యతరగతి ప్రజలే మార్కెట్ నుంచి వేగంగా దూరం కావడం. ₹50 లక్షల లోపు విలువైన బడ్జెట్ ఇళ్ల రిజిస్ట్రేషన్లు ఏకంగా 20 శాతం పతనమవ్వగా, ₹50 లక్షల నుంచి కోటి రూపాయల మధ్య విభాగంలోనూ 6 శాతం క్షీణత నమోదైంది. దీనికి విరుద్ధంగా, కోటి రూపాయలకు పైబడిన ప్రీమియం గృహాల విభాగం మొత్తం లావాదేవీల విలువలో తన వాటాను 54 శాతం నుంచి 56 శాతానికి పెంచుకుని మార్కెట్‌ను నిలబెడుతోంది. జనవరి-సెప్టెంబర్ మధ్య కాలంలో మొత్తం లావాదేవీల విలువ రూ.39,910 కోట్లుగా నమోదైనప్పటికీ, అదంతా అధిక విలువ కలిగిన లగ్జరీ ఇళ్ల వల్లే సాధ్యమైందన్నది చేదు నిజం. భూముల గైడెన్స్ విలువల సవరణ, గృహ రుణాలపై వడ్డీ రేట్ల భారం, అమాంతం పెరిగిన ప్రాపర్టీ ధరల కారణంగా మధ్యతరగతి గృహ స్వప్నం మరింత భారంగా మారుతోంది. మరోవైపు మార్కెట్లో 66 శాతం వాటా కలిగిన 1,000 నుంచి 2,000 చదరపు అడుగుల ఫ్లాట్లకు డిమాండ్ ఉన్నప్పటికీ, క్రయవిక్రయాలు మాత్రం వేగం అందుకోలేకపోతున్నాయి.
రియల్ ఎస్టేట్ రంగాన్ని కేవలం ఒక వ్యాపారంగా కాకుండా ఉపాధి సృష్టికర్తగా గుర్తించాల్సిన అవసరం ప్రభుత్వానికి ఎంతైనా ఉంది. ప్రీమియం ఇళ్ల డిమాండ్ మాత్రమే మార్కెట్‌ను శాశ్వతంగా కాపాడలేదు; సాధారణ ప్రజానీకానికి అందుబాటు ధరల్లో ఇళ్లను అందించడమే స్థిరమైన వృద్ధికి అసలైన పరిష్కారం. గైడెన్స్ విలువల సవరణ ప్రభావాన్ని పునఃసమీక్షించడం, రిజిస్ట్రేషన్ ఛార్జీలలో మధ్యతరగతి కొనుగోలుదారులకు ప్రోత్సాహకాలు కల్పించడం, ప్రభుత్వ అనుమతుల ప్రక్రియను వేగవంతం చేయడం ద్వారా మాత్రమే ఈ స్తబ్దతను అధిగమించగలం. లేనిపక్షంలో, రాష్ట్ర ఆర్థిక ప్రగతికి ఊతమిచ్చిన ప్రధాన రంగం దీర్ఘకాలిక స్తబ్ధతలోకి జారిపోయే ప్రమాదం పొంచి ఉంది. మార్కెట్లో తిరిగి సానుకూల వాతావరణం, కొనుగోలుదారుల్లో విశ్వాసం నింపేందుకు ప్రభుత్వం, డెవలపర్లు సత్వరమే సమన్వయంతో కార్యాచరణ చేపట్టాల్సిన సమయమిది.
