చోటా చర్యలపై ఇంటిలిజెన్స్ ఆరా!
సిఎం రేవంత్ కు ఫిర్యాదు చేసిన బడా లీడర్
శిష్యుడి సెటిల్మెంట్ల తో కొండా దంపతులకు ఇబ్బందులు
ఎక్కడైనా శిష్యులు గురువును చూసి తాము ఉన్నత స్థాయికి చేరడానికి ప్రయత్నిస్తారు. గురువు చూపినబాటలో పయనించి ఉన్నతి సాధిస్తారు. వరంగల్ తూర్పు నియోజకవర్గంలో మాత్రం గురువును మి(ము)oచిన శిష్యుడుగా పేరు సంపాదించాడు ఓ ప్రబుద్ధుడు. రాష్ట్ర మంత్రివర్గంలో కీలక మంత్రిగా ఉన్న కొండా సురేఖ, ఆమె భర్త కొండా మురళీధర్ రావు శిష్యుడిగా ముద్రపడ్డ ఓ షాడో నీడ కొండా దంపతులకు సంకటంగా మారింది. గురువును మించిన శిష్యుడిగా కాకుండా గురువును ముంచిన శిష్యుడిగా పేరు తెచ్చుకున్నాడు. కాంగ్రెస్ లో వరంగల్ తూర్పు నుంచి ఎమ్మెల్యేగా విజయం సాధించి మంత్రి పదవి చేపట్టిన సురేఖకు ఇప్పుడు శిష్యుడి రూపంలో ఇబ్బందులు తలెత్తనున్నాయి. ‘సార్’ చెప్పాడంటూ సెటిల్మెంట్లకు పాల్పడుతున్న సదరు ప్రబుద్ధుడు చేసే పనుల వల్ల కొండా దంపతులకు రాష్ట్ర వ్యాప్తంగా చెడ్డ పేరు వస్తోంది. ఒక వైపు కేటీఆర్ పై విమర్శల వివాదంలో ఇబ్బందులు ఎదుర్కొంటున్న మంత్రి సురేఖకు శిష్య పరమాణువు చేస్తున్న చేష్టలు తలనొప్పిగా మారాయి. తన పుట్టినరోజు వేడుకలు అంటూ రూ.30 లక్షలకు పైగా ఖర్చు చేసిన చోటా లీడర్ కటౌట్లు, ఫ్లెక్సీలు బ్యానర్లతో మూడు రోజుల పాటు చేసిన హంగామా కొండా దంపతుల కొంప ముంచనుంది. సదరు శిష్యుడికి ఇంత డబ్బు ఎక్కడిది? అసలు ఆ శిష్యుడు చేసే పని ఏంటి? అనే విషయంపై ఇంటిలిజెన్స్ విభాగాలు ఇప్పటికే ఆరా తీయడం మొదలు పెట్టాయి. జిల్లాకు చెందినట్లు సమాచారం. ఆ వివరాలు అన్నీ కలిపి ఓ గ్రంథమే అయిందని తెలిసింది. హనుమకొండ ప్రాంతానికి చెందిన ఆ బడా నేత.. సీఎం రేవంత్ రెడ్డికి అత్యంత సన్నిహితుడిగా ముద్ర ఉంది. ఆయన కొండా శిష్య ప్రబుద్ధుడు పై ప్రత్యేక నిఘా పెట్టినట్లు తెలుస్తోంది. అక్రమంగా సంపాదించిన డబ్బులను విచ్చలవిడిగా ఖర్చు చేస్తున్న ఆ శిష్య పరమాణువు పుట్టినరోజు వేళ భారీ కాన్వాయ్ తో భద్రకాళి దేవాలయం వరకు ఎలా వెళ్లాడు? పోలీసులు ఎలా అనుమతిచ్చారు? ప్రోటోకాల్ లేని ఆ వ్యక్తికి ఆలయంలో ఎలా మర్యాదలు దక్కాయి? భారీ స్థాయిలో ఫ్లెక్సీలు కటౌట్ లు కడితే కార్పొరేషన్ అధికారులు చూస్తూ ఊరకున్నారు? ఈ వ్యవహారంలో పోలీసుల పాత్ర ఏంటి? వంటి పలు కోణాల్లో ముఖ్యమంత్రికి ఇప్పటికే నివేదికలు అందినట్లు సమాచారం. కొండా దంపతులకు కొరకరాని కొయ్యగా మారిన చోటా లీడర్ తతంగం ఏ పరిస్థితికి దారితీస్తుందో!? అని కాంగ్రెస్ సీనియర్లు, కొండా అనుచరులు వేచి చూస్తున్నారు.
