రాఖీతో రాజీ కుదిరేనా!?|RAKHI POURNAMI
చర్యలకే మొగ్గు చూపేనా?
కొండా వివాదం ఎటువైపు?|KONDA SUREKHA|CM|REVANTH REDDY
తెలంగాణ కాంగ్రెస్‌లో మంత్రి కొండా సురేఖ చుట్టూ నెలకొన్న తాజా వివాదాస్పద పరిణామాలు పార్టీలో క్రమశిక్షణ, వ్యక్తిగత రాజకీయ సంబంధాలు, అధిష్ఠానం నిర్ణయం అనే మూడు అంశాలను ముందుకు తెచ్చాయి. మంత్రి కొండా సురేఖ కుమార్తె సుస్మితా పటేల్ చేసిన వ్యాఖ్యలతో మొదలైన వివాదం, ఆ తర్వాత పార్టీ పెద్దలతో జరిగిన చర్చలు, తాజాగా ముఖ్యమంత్రి రేవంత్‌రెడ్డిని కలసి సురేఖ బంగారు రాఖీ కట్టడం వరకు ఈ పరిణామాలన్నింటినీ పరిశీలిస్తే, ఇది ఉద్వాసన దిశగా వెళ్తున్న వ్యవహారమా? లేక రాజకీయ ఉపేక్షతో ముగిసే వివాదమా? అన్న ప్రశ్నలు ఉత్పన్నమువుతున్నాయి.
సుస్మితా పటేల్ వ్యాఖ్యల వ్యవహారం వ్యక్తిగత స్థాయిని దాటి పార్టీ అంతర్గత క్రమశిక్షణ అంశంగా మారింది. పరకాల ఎమ్మెల్యే రేవూరి ప్రకాశ్‌రెడ్డితో పాటు సీఎం రేవంత్‌రెడ్డిపై కూడా ఆమె వ్యాఖ్యలు చేయడంతో వివరణలు, చర్యలపై చర్చ మొదలైంది. ఈ నేపథ్యంలో అధిష్ఠానం స్పందన ఎలా ఉంటుందన్నది కాంగ్రెస్ వర్గాల్లో ఆసక్తిని రేకెత్తించింది. పార్టీ ఇప్పటికే అంతర్గత విభేదాలను అదుపులో ఉంచే ప్రయత్నం చేస్తున్న సమయంలో ఈ వివాదం మరింత రాజకీయ ప్రాధాన్యాన్ని సంతరించుకుంది.
అయితే, రాఖీ రాజకీయం ఇప్పుడు చర్చనీయాంశంగా మారింది. సీఎం రేవంత్‌రెడ్డికి సురేఖ ప్రత్యేకంగా చేయించిన బంగారు రాఖీ కట్టినట్లు ఆమె స్వయంగా వెల్లడించారు. సీఎం మనవడు, అల్లుడికి కూడా రాఖీ కట్టానని, తాను అందరికీ ఆడపడుచునేనని ఆమె పేర్కొన్నారు. ఇది సాధారణ పండుగ సంప్రదాయంగా చూడవచ్చా? లేక వివాదానికి రాజకీయ ముగింపు పలికే సంకేతంగా భావించాలా? సమాధానం మాత్రం ఇంకా స్పష్టంగా లేదు. ఇక్కడ గణాంకాల కంటే రాజకీయ సమీకరణలే కీలకం. తెలంగాణ అసెంబ్లీలో మొత్తం 119 స్థానాలుండగా, 2023 ఎన్నికల్లో కాంగ్రెస్ 64 స్థానాలతో ప్రభుత్వాన్ని ఏర్పాటు చేసింది. అంటే అధికార పార్టీకి మెజారిటీ ఉన్నప్పటికీ, అంతర్గత అసంతృప్తి ప్రతి అంశాన్నీ రాజకీయంగా సున్నితంగా మారుస్తుంది. ఒక్క ఎమ్మెల్యే లేదా ఒక్క మంత్రి చుట్టూ ఏర్పడే వివాదం సంఖ్యాపరంగా ప్రభుత్వాన్ని కూల్చే స్థాయిలో లేకపోయినా, పార్టీ ప్రతిష్ఠ, నాయకత్వ నియంత్రణ, భవిష్యత్ ఎన్నికల సమీకరణాలపై ప్రభావం చూపగలదు.
అందుకే అధిష్ఠానం ముందు రెండు మార్గాలున్నాయి. మొదటిది క్రమశిక్షణ విషయంలో కఠినంగా వ్యవహరించి, పార్టీ నిర్ణయాలకు ఎవరూ అతీతులు కారనే సందేశం ఇవ్వడం. రెండోది వివాదాన్ని కుటుంబ, వ్యక్తిగత స్థాయిలోనే పరిమితం చేసి రాజకీయ రాజీకి అవకాశం ఇవ్వడం. రాఖీ ఘటన రెండో మార్గానికి తలుపు తెరిచిన సంకేతంలా కనిపించినా, అది అధికారికంగా వివాదం ముగిసిందనే అర్థం కాదు.
అంతిమంగా కొండా వ్యవహారం ఒక వ్యక్తి రాజకీయ భవితవ్యానికి మాత్రమే సంబంధించినది కాదు. తెలంగాణ కాంగ్రెస్‌లో నాయకత్వం మాట ఎంత బలంగా అమలవుతుంది? పార్టీ క్రమశిక్షణకు ఎంత విలువ ఉంది? వ్యక్తిగత సంబంధాలు రాజకీయ విభేదాలను ఎంతవరకు కరిగించగలవు? అన్న ప్రశ్నలకు ఇది ఒక పరీక్ష. అందుకే ఇప్పుడు అందరి చూపు మంత్రి కొండ సురేఖపైనే కేంద్రీక్రుతం అయింది. సురేఖకు ఉద్వాసన తప్పదా? ఉపేక్ష దక్కుతుందా? లేక రాఖీతోనే రాజీకి తెరపడుతుందా?
