లోకో భిన్న రుచి: అన్నరు. అంటే గీ లోకంల ఒక్కొక్కరి రుసి, అభిరుసి యేర్వేరుగా ఉంటయన్నట్లు. ఏ ఇద్దరి రసులు, అభిరుసులు అంత అల్కగ కలవయి. గట్లనే గా పెండ్లం మొగుల్ల ముచ్చట కూడా. నొసట ఏం రాసుంటదో గనీ, ఎడ్డెమంటే తెడ్డెమని, నోర్లు మాత్రం తిక్క తిక్కగ తైతక్కలాడ్తనే ఉంటయి. శీటికి మాటికి శిట్కు పొట్కుమని ఊకూకనే యిడాకులైతానయి. పెండ్లిల్లు పీటలెక్కక ముందే పెటాకులైపోతానయి. గా మద్దెల ఒకామె, నా పెనిమిటి మస్తు మంచిగ సూసుకుంటాండని యిడాకులు తీసుకున్నది!? మొగుడు పెండ్లాలన్నంక ముక్కిరుసుడు, మూతి ఒంకర్లు, అప్పుడప్పుడు అర్సుకునుడు, యీపు యిమానం మోత మోగుడు లేకపోతే, మొగుడెట్లైతడు? అందట! కనీ, ఇగో గీమె ఇంకో లెక్కల యిడాకులు అడిగింది. గదేందో సూద్దాం పదండ్రి.
మధ్యప్రదేశ్ భోపాల్ ల ఉండే ఓ జంట తంటా గిది. పక్కల పక్కనే పడుకునే మొగుడు ఒకటే గుర్రు పెడ్తాండట! ఇగ గా గుర్రుకు గామెకు నిద్దురే కరువైందట. గిదంత పని కాదని ఐదేండ్ల సంసారానికి చెల్లు శీటి రాసింది. యిడాకులు కావాల్నని కోర్టుకు పోయింది. కారణం తెల్సుకున్న గా కోర్టోల్లు విశారించి, గామెకు నచ్చ శెప్పి, 3 నెల్లు ఏరేరుగ ఉండమన్నరట. గా ఏరు మిగిల్చిన ఎడబాటుతోటి, మూన్నెల్లు తిరిగే సరికి, గుర్రో, బిర్రో.. గయన్ని కాదని, ఇగమల్లా కాపురం శేసుకుంటమని ఒక్కటైండ్లట!? గుర్రు ముంచినా, కోర్టు తేల్చింది కదా?
