కొత్త శకం ఆరంభం
తమిళనాడు రాజకీయాల్లో సరికొత్త అధ్యాయం మొదలైంది. తమిళగ వెట్రి కజగం (TVK) అధినేత, సినీ నటుడు జోసెఫ్ విజయ్ ఆ రాష్ట్ర నూతన ముఖ్యమంత్రిగా బాధ్యతలు చేపట్టారు. చెన్నైలోని జవహర్లాల్ నెహ్రూ ఇండోర్ స్టేడియంలో అత్యంత వైభవంగా జరిగిన ఈ కార్యక్రమంలో గవర్నర్ ఆర్లేకర్ ఆయనతో ప్రమాణ స్వీకారం చేయించారు. మే 4న విడుదలైన అసెంబ్లీ ఎన్నికల ఫలితాల్లో టీవీకే అతిపెద్ద పార్టీగా అవతరించినప్పటికీ, స్పష్టమైన మెజార్టీకి 10 స్థానాల దూరంలో నిలిచింది. దీంతో కాంగ్రెస్, వామపక్షాలు, వీసీకే, ఐయూఎంల్ పార్టీల మద్దతుతో విజయ్ సంకీర్ణ ప్రభుత్వాన్ని ఏర్పాటు చేశారు. మద్దతు కూడగట్టే ప్రక్రియ కారణంగా ప్రమాణ స్వీకార కార్యక్రమం స్వల్పంగా ఆలస్యమైంది.
విజయ్తో పాటు మొత్తం తొమ్మిది మంది మంత్రులుగా ప్రమాణ స్వీకారం చేశారు. వీరిలో ఎన్. ఆనంద్, ఆదవ అర్జున, కె.ఎ. సెంగోటియన్, ఎస్. కీర్తన, కె.జి. అరుణ్ రాజ్, పి. వెంకటరమణన్, సి.ఆర్. నిర్మల్ కుమార్, రాజ్మాహన్, టి.కె. ప్రభు ఉన్నారు. ఈ చారిత్రాత్మక ఘట్టానికి కాంగ్రెస్ అగ్రనేత రాహుల్ గాంధీతో పాటు భాజపా నేతలు నైనార్ నాగేంద్రన్, అన్నామలై మరియు పలువురు సినీ, రాజకీయ ప్రముఖులు హాజరయ్యారు. ముఖ్యంగా నటి త్రిష ఈ వేడుకలో ప్రత్యేక ఆకర్షణగా నిలిచారు. తొలుత వైట్ అండ్ బ్లాక్ ఫార్మల్ దుస్తుల్లో విచ్చేసిన విజయ్, ప్రమాణ స్వీకార సమయంలో బ్లాక్ బ్లేజర్ ధరించి తనదైన శైలిలో ఆకట్టుకున్నారు. ఒక సినీ స్టార్ స్థాయి నుండి రాష్ట్ర ముఖ్యమంత్రిగా విజయ్ ప్రస్థానం తమిళ రాజకీయాల్లో పెను మార్పులకు సంకేతంగా నిలుస్తోంది.
