(ప్రపంచ ఫార్మసిస్ట్ ల దినోత్సవం : 25 సెప్టెంబర్ 2026)
ప్రపంచంలో ఔషధం అవసరం లేని మనిషి లేడంటే అతిశయోక్తి కాదు. ఔషధ ప్రయోక్తలైన ఫార్మసిస్ట్ లు ప్రతి నిత్యం ప్రపంచవ్యాప్తంగా ఔషధాలతో పాటు క్లిష్టమైన ఆరోగ్య అవసరాలను తీర్చుతున్నారు. ఫార్మసిస్ట్ లు కీలకమైన ఔషధాల ఉత్పత్తి, సరఫరా, వితరణ, చికిత్స, నవీన శాస్త్రీయ ఆవిష్కరణలు వంటి రోగి సంరక్షణ క్షేత్రంలో ప్రత్యేక స్థానమందు ఉన్నారు. ఫార్మసిస్ట్ లు తమ నిపుణతను పూర్తి స్థాయిలో ప్రదర్శించి ప్రాక్టీస్ చేయకలిగే పరిస్థితులు కల్పిస్తే, ఆరోగ్య వ్యవస్థలు ప్రజలకు మరింత చేరువ, మరింత బాధ్యత, మరింత సుస్థిరతగ ఉంటాయి. మరింత మంచి ఆరోగ్య ఫలితాల కోసం ఫార్మసిస్ట్ లు చేస్తున్న ప్రదానాలను దృశ్యీకరించటానికి, వేడుక చేసుకోవటానికి సెప్టెంబర్ 25 వరల్డ్ ఫార్మసిస్ట్స్ డే మనకు ఒక అవకాశం. కనుక, 2026 వరల్డ్ ఫార్మసిస్ట్స్ డే కోసం “ఎంపవరింగ్ ఫార్మసిస్ట్స్ ఫర్ హెల్దియర్ ఫ్యూచర్స్” అనే నినాదాన్ని ఎంపిక చేసింది ఇంటర్నేషనల్ ఫెడరేషన్ ఆఫ్ ఫార్మసిస్ట్స్ (ఎఫ్ ఐ పి). ఫార్మసిస్ట్ లను సశక్తీకరించటం అంటే మారుతున్న ఆరోగ్య అవసరాలకు అనుగుణంగా వారిని నైపుణ్యాలతో సిద్ధం చేయటం, గుర్తింపు, అనువైన పని వాతావరణం కల్పించటం అంటారు ఎఫ్ ఐ పి అధ్యక్షుడు పాల్ సింక్లెయిర్. ఈ సశక్తీకరణ ఐచ్ఛికం కాదు, బలమైన భవిష్యత్ సంసిద్ధ వ్యవస్థల నిర్మాణం కోసం ఆవశ్యకం అని నొక్కి చెబుతుంది ఎఫ్ ఐ పి.
ఇంక మన భారతదేశం విషయానికి వస్తే, దేశంలో 12 లక్షల రిజిస్టర్డ్ ఫార్మసిస్ట్ లు ఉన్నారు. 8 లక్షల 50 వేల మంది ఫార్మసిస్ట్ లు కమ్యూనిటీ, హాస్పిటల్, ఇండస్ట్రీ, ఆకాడమియ మరియు రెగ్యులేటరీ రంగాలలో చురుకుగా పని చేస్తున్నారు. వీరిలో 58 శాతం మహిళలు. 35 సంవత్సరాల లోపు వయసున్న యువత 40 శాతం. దేశంలో ఫార్మసిస్ట్ ల సాంద్రత 10 వేల జనాభాకు 9.1. ఇది ప్రపంచ సగటు 9.55 కు చాలా దగ్గర. కేంద్ర ప్రభుత్వ ఆయుష్మాన్ భారత్ మరియు ఫార్మసీ కౌన్సిల్ ఆఫ్ ఇండియా ఫార్మసిస్ట్ ల హెల్త్ ప్రొఫెషనల్ రిజిస్ట్రీ చేస్తున్నాయి. ఇన్ని సానుకూల అంశాలు ఉన్నందున ప్రభుత్వం, ఆరోగ్య వ్యవస్థలు, ప్రజలు ఫార్మసిస్ట్ ల సేవలను పూర్తి స్థాయిలో సమర్థవంతంగా వినియోగించు కొన్నట్లయితే “స్వస్థ్ భారత్” సాకారం సుసాధ్యమే!
ప్రభుత్వ బాధ్యత: మన దేశంలో ఫార్మసిస్ట్ లకు సరియైన గుర్తింపు ఈయక, వారి విజ్ఞానాన్ని సరిగా వినియోగించుకోక చాలా నష్టపోతున్నాం. ప్రభుత్వ సంకల్పంతో ఫార్మసిస్ట్ లకు సరియైన గుర్తింపు కల్పించి, వారి సేవలను సద్వినియోగం చేసుకొని, సత్ఫలితాలు సాధించవచ్చు. అన్ని వైద్యశాలలలో హాస్పిటల్ అండ్ క్లినికల్ ఫార్మసీ డిపార్ట్మెంట్స్ నెలకొల్పాలి. సహేతుక ఔషధ వినియోగం, విచక్షణాయుత ఆంటీ మైక్రోబియల్ వాడకం అమలు పరచాలి. అన్ని జాతీయ ఆరోగ్య కార్యక్రమాలలో ఫార్మసిస్ట్ లకు సముచిత స్థానం కల్పించాలి. ప్రాథమిక వైద్యం, దీర్ఘ వ్యాధుల నిర్వహణ, వ్యాక్సినేషన్, వైద్య శిబిరాలు, మహామారులు, ప్రకృతి విపత్తులు వంటి సందర్భాలలో ఔషధ చికిత్స కోసం ప్రిస్క్రిప్షన్ అధికారాలు ఇచ్చి పరిధి పెంచాలి. ఔషధ నియంత్రణ శాఖను పటిష్ట పరచాలి.
ఇతర హెల్త్ ప్రొఫెషనల్స్ పాత్ర: ఔషధం లేని చికిత్స ఊహించ లేము. ఔషధ నిపుణులైన ఫార్మసిస్ట్ లు చికిత్సా బృందంలో కీలకమైన సభ్యులు. మెడికల్ ప్రాక్టీషనర్ లు, నర్స్ లు ఈ విషయం గ్రహించి ఔషధ చికిత్సలో ఫార్మసిస్ట్ లను కలుపుకొని పని చేయాలి. సమిష్టి పనితీరు మరియు పరస్పర రెఫరల్ ఉండాలి. ఫార్మసిస్ట్ ల ఔషధ పరిజ్ఞానం వారికీ, క్లయెంట్ లకు ఉభయతారకం కాగలదు.
ప్రజల పాత్ర: ఫార్మసిస్ట్ ను ఏదో ఒక ఆరోగ్య అవసరానికి కలువని వ్యక్తి ఉండరు. ప్రాథమిక చికిత్స, స్వీయ చికిత్స, దీర్ఘ కాలిక వ్యాధుల చికిత్స, సీజనల్ వ్యాధులు, ఎపిడెమిక్స్, వ్యాధి నివారణ, వాక్సినేషన్ వంటి అవసరాలు తీర్చడానికి తక్షణం అందుబాటులో ఉండే హెల్త్ ప్రొఫెషనల్ ఫార్మసిస్ట్ మాత్రమే!
ఫార్మసిస్ట్ ల సేవలకు కృతజ్ఞత తెలుపటానికి, వారిని మరింత సశక్తీకృతులను చేయటానికి వరల్డ్ ఫార్మసిస్ట్స్ డే ఒక మంచి సందర్భం!
