తెలంగాణ రాష్ట్రంలోని సంగారెడ్డిలో సుగంధ ద్రవ్యాల ఉత్పత్తి ఎక్సలెన్స్ సెంటర్ ఏర్పాటు చేయడానికి సుహానా మసాలా, ఎకో ఫ్యాక్టరీ ఫౌండేషన్ రాష్ట్ర ప్రభుత్వంతో భాగస్వామ్యం కుదుర్చుకున్నాయి. ప్రస్తుత సుహానా ప్లాంట్ పక్కనే ఈ కొత్త కేంద్రాన్ని నిర్మిస్తారు. ఈ కేంద్రం ప్రపంచ స్థాయి ప్రమాణాలకు అనుగుణంగా సుగంధ ద్రవ్యాల సాగు పద్ధతుల్లో విప్లవాత్మక మార్పులను తీసుకురావడమే లక్ష్యంగా పనిచేస్తుంది.
దావోస్లో జరిగిన ప్రపంచ ఆర్థిక వేదిక సమావేశంలో సుహానా డైరెక్టర్ ఆనంద్ చోర్డియా రాష్ట్ర పరిశ్రమల శాఖ మంత్రి డి. శ్రీధర్ బాబుతో ఈ ప్రాజెక్టుపై చర్చించారు. రాబోయే 2-3 ఏళ్లలో ఈ కేంద్రం ద్వారా 25,000 నుంచి 30,000 మంది రైతులకు శిక్షణ ఇవ్వనున్నారు. రైతులకు సుగంధ ద్రవ్యాల నాణ్యతను మెరుగుపరచడం, వ్యవసాయ పద్ధతులను ఆధునికీకరించడం, అంతర్జాతీయ ప్రమాణాలను పాటించే నైపుణ్యాలను అందించడమే ప్రధాన లక్ష్యంగా ఉంది.
ఈ ఎక్సలెన్స్ సెంటర్ పర్యావరణ అనుకూల వ్యవసాయ పద్ధతులను ప్రోత్సహించడంతోపాటు సహజ వనరుల సంరక్షణకు దోహదపడుతుంది. రైతుల జీవనోపాధిని పెంపొందించేలా మార్కెటింగ్ సదుపాయాలను కూడా అందిస్తారు. అత్యాధునిక సాంకేతికతలు, పరిశోధనలతో వ్యవసాయ రంగంలో పురోగతి సాధించేందుకు ఈ సెంటర్ కృషి చేస్తుంది.
దేశంలోని అతిపెద్ద మిరప ప్రాసెసింగ్ యూనిట్లలో ఒకటైన సంగారెడ్డి ఈ ప్రాజెక్టుకు తగిన ప్రదేశంగా ఎంపికైంది. తెలంగాణను సుగంధ ద్రవ్యాల ఉత్పత్తిలో ప్రపంచ స్థాయికి తీసుకెళ్లేందుకు కట్టుబడి ఉన్నామని సుహానా మసాలా ప్రతినిధులు పేర్కొన్నారు.
