CJP అధినేత అభిజీత్ దీప్కే తల్లి అనిత ఆసక్తికర వ్యాఖ్యలు|MOTHER|ANITA DIPKE
‘కాక్రోచ్ జనతా పార్టీ’ (CJP) వ్యవస్థాపకుడిగా, విద్యార్థుల హక్కుల పోరాటంతో దేశవ్యాప్తంగా సంచలనం సృష్టించిన అభిజీత్ దీప్కే వివాహంపై ఆయన తల్లి అనితా దీప్కే పలు ఆసక్తికర విషయాలను పంచుకున్నారు. ఇటీవల ఢిల్లీ వేదికగా నిర్వహించిన విద్యార్థుల ఆందోళనల తర్వాత అభిజీత్కు జాతీయ స్థాయిలో విపరీతమైన ప్రజాదరణ లభించిందని, దాంతో ప్రస్తుతం ‘మా అమ్మాయిని పెళ్లి చేసుకోండి’ అంటూ దేశం నలుమూలల నుంచి సంబంధాలు వెల్లువెత్తుతున్నాయని ఆమె తెలిపారు. గతంలో అమెరికాలో చదువుకునేటప్పుడు పెళ్లి ప్రస్తావన తెస్తే అభిజీత్ నవ్వుతూ దాటవేసేవాడని, చదువు పూర్తిచేసి ఆర్థికంగా సొంత కాళ్లపై నిలబడ్డాకే పెళ్లి చేసుకుంటానని చెప్పేవాడని గుర్తుచేసుకున్నారు. రాబోయే జనవరి నాటికి తమ కుమారుడి వివాహం జరిపించాలని ఆశిస్తున్నామని, కాబోయే కోడలు ఎలాంటిది కావాలనే తుది నిర్ణయాన్ని పూర్తిగా అభిజీత్ ఇష్టానికే వదిలేశామని ఆమె స్పష్టం చేశారు. జీవితంలో అతను ఏ నిర్ణయం తీసుకున్నా కుటుంబం తరఫున పూర్తి మద్దతు ఉంటుందని తెలిపారు.
విద్యార్థి ఉద్యమం వెనుక ఉన్న అసలు కారణాన్ని వెల్లడిస్తూ, నీట్ (NEET) పేపర్ లీకేజీ వల్ల మనస్తాపానికి గురై పలువురు విద్యార్థులు ఆత్మహత్యలు చేసుకున్న సమయంలో నాగ్పూర్కు చెందిన ఒక బాధిత కుటుంబం అభిజీత్ను కలిసి తమ ఆవేదనను వ్యక్తపరిచిందని ఆమె పేర్కొన్నారు. ఆ బాధిత కుటుంబం చేసిన విజ్ఞప్తి, యువత ఆవేదన అభిజీత్ మనసును తీవ్రంగా కలచివేసిందని, ఆ ఘటన తర్వాతే దేశంలోని విద్యార్థుల భవిష్యత్తు కోసం గళమెత్తాలనే దృఢ సంకల్పంతో ఈ సుదీర్ఘ పోరాటానికి శ్రీకారం చుట్టాడని అనితా వివరించారు. ప్రస్తుతం అభిజీత్ ఢిల్లీలోనే విశ్రాంతి తీసుకుంటున్నాడని, ఆయన ఇంటికి తిరిగి వచ్చాక కుటుంబంతో కలిసి పెళ్లితో పాటు ఇతర విషయాలపై సమగ్రంగా చర్చిస్తామని ఆమె చెప్పారు.
