పెరిగిన ఉత్తీర్ణత శాతం
తెలంగాణ ఇంటర్మీడియట్ బోర్డు (TGBIE) మంగళవారం IPE మార్చి 2025 ఫలితాలను విడుదల చేసింది. మొత్తం 9,97,012 మంది విద్యార్థులు పరీక్షలు రాయగా, విద్యార్థుల ఉత్తీర్ణత శాతం గతేడాదితో పోలిస్తే మెరుగ్గా నమోదైంది. ఈసారి పరీక్షలు మార్చి 5 నుంచి 25 వరకు జరిగాయి. ప్రాక్టికల్ పరీక్షలు ఫిబ్రవరి 3 నుంచి 22 వరకు నిర్వహించారు. రాష్ట్రవ్యాప్తంగా 1,532 పరీక్షా కేంద్రాలు ఏర్పాటు చేయగా, 18,518 మంది మూల్యాంకనాధికారులు, 29,992 మంది పర్యవేక్షకులు పాల్గొన్నారు. మొత్తం 19 స్పాట్ వాల్యూయేషన్ కేంద్రాల్లో పేపర్ల మూల్యాంకనం చేపట్టారు.
ఫలితాల విషయానికి వస్తే, ఫస్ట్ ఇయర్కు సంబంధించిన జనరల్ మరియు వొకేషనల్ కోర్సుల్లో మొత్తం 4,88,430 మంది పరీక్షలకు హాజరయ్యారు. అందులో 3,22,191 మంది ఉత్తీర్ణత సాధించారు. మొత్తం ఉత్తీర్ణత శాతం 65.96% కాగా, అమ్మాయిల ఉత్తీర్ణత శాతం 73.83% ఉండగా, అబ్బాయిలది 57.83% గా నమోదైంది. రెండవ సంవత్సరం ఫలితాల్లో మొత్తం 5,08,582 మంది హాజరుకాగా, 3,33,908 మంది ఉత్తీర్ణత సాధించారు. మొత్తం ఉత్తీర్ణత శాతం 65.65% కాగా, అమ్మాయిలది 74.21%, అబ్బాయిలది 57.31% గా నమోదైంది.
విభాగాల వారీగా పరిశీలిస్తే, MPC గ్రూప్లో మొదటి సంవత్సరం ఉత్తీర్ణత శాతం 76.65%, రెండవ సంవత్సరం 72.23% గా ఉంది. BPCలో మొదటి సంవత్సరం 67.88%, రెండవ సంవత్సరం 71.93%; CECలో వరుసగా 45.56% మరియు 46.92%; HECలో 34.51% మరియు 46.26%; MECలో 65.53% మరియు 56.96% గా ఉంది.
గత అయిదేళ్ల ఫలితాలను పరిశీలిస్తే, 2021లో కోవిడ్ కారణంగా 100% ఉత్తీర్ణతగా ప్రకటించగా, 2022లో మొదటి సంవత్సరం 64.86%, రెండవ సంవత్సరం 68.68%; 2023లో వరుసగా 62.85%, 67.27%; 2024లో 61.06%, 69.46%; ఈసారి 2025లో 66.89% మరియు 71.37% ఉత్తీర్ణత శాతం నమోదు కావడం గమనార్హం.
ఫలితాలను విద్యార్థులు అధికారిక వెబ్సైట్లైన https://tgbie.cgg.gov.in మరియు https://results.cgg.gov.in లింకుల ద్వారా చూసుకోవచ్చు. ఏవైనా సందేహాల కోసం హెల్ప్డెస్క్ ఈమెయిల్: helpdesk-ie-telangana.gov.in, ఫోన్: 9240205555 అందుబాటులో ఉన్నాయి. రాష్ట్రంలోని 2,500 కాలేజీల్లో విద్యార్థులకు కౌన్సెలర్లు అందుబాటులో ఉన్నారు. మానసిక ఆరోగ్య సహాయానికి టోల్ ఫ్రీ నంబర్ 14416 (టెలి-MANAS) ద్వారా సంప్రదించవచ్చు.
రీకౌంటింగ్కు ప్రతి సబ్జెక్టుకు ₹100, స్కాన్డ్ కాపీతో రీవెరిఫికేషన్కు ₹600 చెల్లించాలి. ఆన్లైన్లో 2025 ఏప్రిల్ 23 నుండి 30 వరకు దరఖాస్తు చేసుకోవచ్చు. మేలో నిర్వహించే అడ్వాన్స్డ్ సప్లిమెంటరీ పరీక్షలు మే 22 నుంచి ప్రారంభమవుతాయి. ప్రాక్టికల్స్ జూన్ 3 నుండి 6 వరకు జరుగుతాయి. ఫీజు చెల్లింపు కూడా ఏప్రిల్ 23–30 మధ్యలో చేయవలసి ఉంటుంది.
