మేడారం ప్రత్యేక ప్రతినిధి, జనవరి 27 (అడుగు న్యూస్):
ములుగు జిల్లా, తాడ్వాయి మండలం మేడారం గ్రామంలో నేటి నుంచి ఈ నెల 31 వరకు జరగనున్న సమ్మక్క–సారలమ్మ మహా జాతర సందర్భంగా భక్తులకు ఎలాంటి ఇబ్బందులు లేకుండా పోలీసులు ప్రత్యేక రూట్ మ్యాప్ను రూపొందించారు. వివిధ రాష్ట్రాలు, జిల్లాల నుంచి వచ్చే భక్తులు క్రమబద్ధంగా మేడారం చేరుకునేలా మార్గాలను కేటాయించారు.
హైదరాబాద్, ఖమ్మం, నల్గొండ, జనగామ, వరంగల్ నుంచి వచ్చే వాహనాలు:
ప్రైవేటు వాహనాలు వరంగల్ – ములుగు – పస్రా – వెంగళాపూర్ – నార్లాపూర్ మార్గంలో మేడారంలో ఏర్పాటు చేసిన పార్కింగ్ స్థలాలకు చేరుకోవాలి. తిరుగు ప్రయాణం నార్లాపూర్ – బయ్యక్కపేట – కమలాపూర్ క్రాస్ – భూపాలపల్లి మార్గంలో చేయాలి.
మహారాష్ట్ర, కాళేశ్వరం, భూపాలపల్లి, మంచిర్యాల, గోదావరిఖని, ఆదిలాబాద్, కరీంనగర్ నుంచి:
కమలాపూర్ క్రాస్ – రాంపూర్ – గొల్లబుద్ధారం – బయ్యక్కపేట – నార్లాపూర్ మార్గంలో మేడారం సమీపంలోని ఊరట్టం పార్కింగ్ వరకు చేరుకోవాలి. తిరుగు ప్రయాణం అదే మార్గంలో సాగాలి.
ఛత్తీస్గఢ్, మధ్యప్రదేశ్, ఏపీ, కొత్తగూడెం, భద్రాచలం, చర్ల, ఖమ్మం నుంచి:
ఏటూరునాగారం – చిన్నబోయినపల్లి మార్గంలో ఊరట్టం పార్కింగ్ స్థలాలకు అనుమతి ఉంటుంది. తిరుగు ప్రయాణం ఇదే రూట్లో ఉండాలి.
వీఐపీ వాహనాలు, ఆర్టీసీ బస్సులు:
తాడ్వాయి రూట్ను ప్రత్యేకంగా కేటాయించారు. భక్తులు పోలీసుల సూచనలను పాటించాలని అధికారులు విజ్ఞప్తి చేశారు.
