మహిళా దినోత్సవం సందర్భంగా శుభాకాంక్షలతో..
ఒకడంటడు..
ఆడదంటే పనిమనిషని.
పిండేశేదిరా..
ఎండేశేదిరా..
ఊడిశేదిరా..
తూడిశేదిరా..
అని.
ఇంకోడంటడు..
ఆడదంటే..
వంటమనిషని.
వండేటిదిరా..
పెట్టేటిదిరా..
తోమేదిరా..
కడిగేది..సుత కదారా అని.
ఓ
ఇంట్లోడంటడు..
అది బానిసని..
“కట్టు” (కున్న) బానిసని.
ఆడదంటే పెండ్లాంరా..
ఆడదంటే..
ఊ.. అంటే
పండేదిరా..
ఆ.. అంటే
లేశేదిరా..
పడక సుఖాన్నిచ్చేదిరాబై..
పిల్లలకనే మిషనురోయ్.. అని.
ఆడిపోరగాండ్లు ఇష్టం లేని అయ్యవ్వలైతే..
ఆడదంటే..
కడుపుల పెరకగ
ముందే పీనిగైయ్యే నెత్తురు ముద్ద అని..
తప్పిదారి పుడితే
మురికి కాల్వలల్ల, మూసీనదులల్ల, చెత్తకుప్పలల్లబడే వ్యర్థ మని.
ఆడిపోరగాండ్లలంటే జర పావురమున్న అయ్యవ్వలైతే..
ఆడదంటే..
పిల్ల
పెద్దమనిషి కాంగనే
ఓ అయ్య చేతులబెట్టే బొమ్మ అని.
ఇగ బడికిపోతే..
కొంత మంది
బడి పోరలంటరు..
ఆడదంటే..
కుదిరితే …దోస్తానీ చేశేది.
దొరికితే…మస్తీ..నీ చేశేది. అని.
జర కాలేజీకాడనైతే..
కొంతమంది
కాలేజీపోరండ్లంటరు
ఆడదంటే..
మా రోత కూతలు ఇనెటానికి..
మా ఎకిలి చేష్టలు సూశేటానికి
మాకోసం పుట్టిన జీవులంటరు..
రోడ్డు మీద పోయే..
పోకిరోడంటడు.
ఆడదంటే..
మేం ఏడిపిత్తే ఏడిశేదిరా..
మేం ఆడి పిత్తే ఆడేదిరా..
అని.
పోట్టకూటి కోసం పనికి పోతే..
ఈ సమాజంలో కొన్ని నరం లేని నాలికెలంటయి…
కామం తో చూశే కండ్లంటయ్..
ఆడదంటే..
ఆ ” అవసరం ” నే ముందంటయ్.. ముఖ్యం అని గూడా అంటయ్..
ఓ ప్రేమొన్మాది అంటడు.
ఆడదంటే..
వాన్ని ప్రేమిస్తే మెడలో పసుపు తాడు.
వాని ప్రేమను కాదంటే..
మెడలో ఉరి తాడంటడు.
ఓ సైకో అంటడు.
ఆడదంటే..
వాడి దేహపు ఆకలితీర్చే అవయవాల కుప్ప అంటడు.
పాణం పోయేంత సేపు
” పండుగ ” అని
పెట్రోలు మంటలలో కాల్చబడే పీనుగంటడు.
కానీ…
ఆడదంటే..
జన్మనిచ్చే” అమ్మ ” అని,
అమృతాన్ని పంచే దేవత అని.
ఆడదంటే…
“మరో జన్మన్నిచ్చే రేపటి ” అమ్మ”
కూడా అని
ఎప్పుడు ఎరుకైతదిరా..బై ? మీకు.
