–అడుగు కథనంతో కదిలిన అధికార యంత్రాంగం
-ప్రజా ప్రతినిధుల్లోనూ కదలిక
దాతలు కీ.శే బొబ్బల రంగారెడ్డి జ్ఞాపకార్థం వారి కుమారులు బొబ్బల రమణారెడ్డి, బొబ్బల అశోక్ రెడ్డి లు స్వచ్ఛందంగా, ఉచితంగా పేద విద్యార్థుల భవిష్యత్తు కోసం ఇచ్చిన ఎకరం భూమి.. ప్రభుత్వం వెచ్చించిన రూ.21 లక్షలు.. నిర్మించిన పక్కా భవనం.. అయినా, నిరుపయోగంగా మారిన ఎస్సీ బాలుర హాస్టల్ భవనం! వెరసి జనగామ జిల్లా పాలకుర్తి మండలం గూడూరు గ్రామంలోని ఈ భవనంపై ‘అడుగు ‘ దినపత్రికలో అక్టోబర్ 10న ‘దాతలిచ్చిన ఎకరం.. హాస్టల్‌కు గ్రహణం!’ శీర్షికన ప్రచురితమైన కథనం అధికార యంత్రాంగంలో కదలిక తీసుకొచ్చింది. ప్రజా ప్రతినిధులు స్పందించేలా చేసింది. అయితే, ప్రస్తుతం ఈ భవనంపై ఏం జరుగుతోంది? భవిష్యత్తులో ఏం జరగనుంది? అన్నది ఆసక్తికరంగా మారింది.
కలెక్టర్ ఆదేశాలతో అధికారుల పరిశీలన
అడుగు వార్త ఎలుగెత్తి సమస్య జిల్లా కలెక్టర్ సందీప్ కుమార్ ఝూ దృష్టికి వెళ్లింది. అక్టోబర్ 14న గూడూరు సర్పంచ్ మాచర్ల స్వరూప–పుల్లయ్యలు ఈ భవనం పై ఓ నిర్ణయం తీసుకోవాలని వినతిపత్రం అందించారు., భవన పరిస్థితిని పరిశీలించి నివేదిక ఇవ్వాలని సంబంధిత అధికారులను కలెక్టర్ ఆదేశించారు. ఎస్సీ, బీసీ సంక్షేమ శాఖ అధికారులు, విద్యాశాఖ ప్రతినిధులు.. మరోవైపు నాంచారి మడూరు డిగ్రీ కళాశాల ప్రిన్సిపాల్ తదితరులు గూడూరులోని ఆ భవనాన్ని సందర్శించారు.
బీజేపీ నేతల వినతి.. ఎమ్మెల్యే జోక్యం
ఇదిలా ఉండగా అక్టోబర్ 24న బీజేపీ మండల అధ్యక్షుడు మారం రవికుమార్, రాష్ట్ర నాయకుడు దొంగరి మహేందర్ తదితరులు నిరుపయోగంగా ఉన్న గూడూరు ఎస్సీ హాస్టల్ భవనాన్ని సందర్శించి, పరిశీలించారు. అలాగే ఆ భవనాన్ని పునరుద్ధరించాలని, వెంటనే హాస్టల్ ను కానీ, లేదా వేరే విద్యాసంస్థలను అందులో నడిచే విధంగా చర్యలు తీసుకోవాలని అక్టోబర్ 26న ప్రజావాణిలో కలెక్టర్‌కు వినతిపత్రం అందించారు. ఇదిలా ఉండగా రాష్ట్ర బీజేపీ సీనియర్ నాయకుడు పాకనాటి దామోదర్ రెడ్డి అక్టోబర్ 28న వీడియో ద్వారా సామాజిక మాధ్యమాల ద్వారా ఈ సమస్యను ప్రస్తావించారు. మరి వైపు అక్టోబర్ 29న ఆ గ్రామ సర్పంచ్ ఎమ్మెల్యే యశస్విని రెడ్డి దృష్టికి తీసుకెళ్లగా, భవనాన్ని సీరియస్‌గా పరిశీలించి విద్యాసంస్థ ఏర్పాటు చేసే అవకాశాలను చూడాలని ఆమె అధికారులకు సూచించినట్లు తెలిసింది.
భవన పునరుద్ధరణకు ఏర్పాట్లు!
గూడూరు హాస్టల్ భవన పునరుద్ధరణకు అవసరమైన అంచనాలు సిద్ధం చేయాలని సంబంధిత అధికారులను జిల్లా కలెక్టర్ ఆదేశించినట్లు సమాచారం. ఈ మేరకు ఒకటి రెండు రోజుల్లో అంచనాలు సిద్ధం కానున్నాయి.
ఇదిలా ఉండగా, మరమ్మతులు పూర్తయ్యాకే ఈ భవనాన్ని దేనికి ఉపయోగించాలన్నది నిర్ణయిస్తారని తెలుస్తోంది. ఏదేని విద్యాసంస్థగా లేదా ప్రభుత్వ వసతి గృహంగా వినియోగించే అవకాశాలున్నాయి. అయితే తుది నిర్ణయం ఇంకా వెల్లడికావాల్సి ఉంది. మరోవైపు, భవనాన్ని ఎవరి స్వప్రయోజనాలకు వారు తమకు అనుకూలంగా ఉపయోగించుకునేందుకు కొందరు ప్రయత్నిస్తున్నారనే ప్రచారమూ సాగుతోంది.
దాతల ఆశయం నెరవేరి, ఈ భవనం నిరుపేద విద్యార్థులకు ఉపయోగపడుతుందా? లేక తిరిగి నిరుపయోగంగానే మిగిలిపోతుందా? అన్నది అధికారుల తదుపరి చర్యలపై ఆధారపడి ఉంది.
