కుంభమేళాను తలపించిన మేడారం ప్రభంజనం

జన జాతర!
కనుచూపు మేరా జనమే
నిండైన ఇలవేల్పుల జాతర
జన సంద్రమైన మేడారం
భారీగా తరలివచ్చిన భక్తులు
పెరిగిన ప్రముఖుల సందర్శనలు
క్యూలైన్లలో గంటలతరబడి నిరీక్షణ
క్యూ లైన్లల్లో స్వల్ప తొక్కిసలాట
పస్రా నుంచి భారీగా ట్రాఫిక్ రద్దీ
కిలో మీటర్ల మేర నిలిచిన వాహనాలు
తిరుగు ప్రయాణంలో జనాలు
పోలీసుల అతిపై భక్తుల ఫిర్యాదులు

నేటి సాయంత్రం తల్లుల వన ప్రవేశం

పుట్ట పగిలినట్లు.. నేల ఈనినట్లు.. సంద్రం సడిలేకుండా ఉప్పొంగినట్లు… మేఘం గర్జించి, వర్షించినట్లు… భక్తి దావానలం దహించినట్లు… సుడిగాలి అడవిని చుట్టేసినట్లు… మేడారం అడవంతా హోరెత్తిన జనం.. జన ప్రవాహ ప్రభంజనం!

మేడారం, జనవరి 30 (అడుగు ప్రత్యేక ప్రతినిధి):
కుంకుమ గురుగులే కుల దైవాలు… వెదురు కర్రలే వెలసిన దేవతలు… గద్దెలే గర్భగుడులు…వృక్షాల నీడలే గుడారాలు కోట్లాది హృదయాల భక్తి పారవశ్యం. సకల జనాలను ఏకం చేస్తున్న మేడారం.
ఒడిబియ్యమే పరమాన్నం.. నెత్తి మీద బోనం.. బెల్లమే తులాభారం, నిలువెత్తు బంగారం.. పసుపు–కుంకుమలే పెట్టుబోతలు.. బట్ట–రైక ముక్కలే చీర సారెలు… శివసత్తుల పూనకాలు, వేడుకోళ్ళు… కోడి పుంజులే ఎదురుకోళ్ళు… కండ్ల చూసే మొక్కుబడులు. తల్లుల పోరాటాలకు పలవరించి, త్యాగాలకు పులకరించి, వన దేవతలకు జనం జేజేలు పలికే అపూర్వ ఆధ్యాత్మిక మహోత్సవం మేడారం సమ్మక్క–సారలమ్మ మహా జాతర. భళా మరో కుంభమేళా!
జనం భక్తి పారవశ్యంతో వన దేవత, మన దేవత, జన దేవత అంటూ అపార విశ్వాసంతో, అత్యంత భక్తి శ్రద్ధలతో కోట్లాది భక్తుల హృదయాలను ఏకం చేసే ఈ ప్రపంచ ప్రసిద్ధ జాతరకు దేశం నలుమూలలతో పాటు వివిధ రాష్ట్రాల నుంచి లక్షలాది భక్తజనం మేడారానికి పోటెత్తుతున్నారు. ఆదివాసీ సంప్రదాయాలు, చారిత్రక పోరాటాల, త్యాగాల తల్లులపై ప్రజల నమ్మకం, ఆధ్యాత్మిక విశ్వాసం మేళవించిన ఈ జాతరలో భక్తుల భక్తి చల్లని సంద్రంగా ఉప్పొంగుతోంది.

జంపన్న వాగులో జల స్నానాలు, తల నీలాలు
జంపన్న వాగు పొడవునా జనం పుణ్య స్నానాలాచరిస్తున్నారు. తల నీలాలు సమర్పిస్తున్నారు. శివసత్తులు ఊగుతున్నారు. తడి బట్ట స్నానాలతోనే అమ్మవారి దర్శనాలకు వస్తున్నారు. ఒడి బియ్యం మూట గట్టుకుని, నిలువెత్తు బంగారాన్ని తల మీద మోసుకుంటూ జనం గద్దెల వద్దకు క్యూ కడుతున్నారు.

జనంతో దద్దరిల్లుతున్న గద్దెలు
మేడారం జాతర ప్రాంగణం మొత్తం భక్తులతో కిక్కిరిసిపోయింది. ఎటు చూసినా జనమే. అమ్మవారి నామస్మరణలే మార్మోగుతున్నాయి. క్యూ లైన్లలో భక్తులు శాంతియుతంగా తల్లుల దర్శనానికి నడుస్తున్నారు. గద్దెల వద్ద దర్శనాలు ముగించుకుని, వెంట తెచ్చిన బంగారాన్ని అమ్మలకు సమర్పించి, మొక్కులు తీర్చుకుంటున్నారు.

వన భోజనాలు…
దర్శనాలనంతరం భక్తులు వన భోజనాలు చేస్తున్నారు. వెంట తెచ్చుకున్న మేకలు, గొర్లను అమ్మల పేరున కోసి, అర్పించి, ఆరగిస్తున్నారు. అలా వెళ్ళి.. ఇలా వచ్చే వారికంటే. ఈసారి వనంలోనే రెండు మూడు రోజులు ఉంటున్నారు. చెట్టునీడ, గుడారాలు వేసుకుని, తనివి తీరా, అడవిని ఆస్వాదిస్తున్నారు.

అప్రమత్తంగా అధికార యంత్రాంగం
భారీ భక్తుల రద్దీకి తగ్గట్లుగా రాష్ట్ర ప్రభుత్వం ఈసారి భారీ ఏర్పాట్లు చేసింది. కోట్లాది రూపాయలతో శాశ్వత ప్రాతిపదికన నిర్మాణాలు చేపట్టింది. వివిధ శాఖల సమన్వయంతో పకడ్బందీ ఏర్పాట్లు చేపట్టింది. ట్రాఫిక్ నియంత్రణ, క్యూ లైన్లు, భద్రతా చర్యలపై ప్రత్యేక దృష్టి సారించారు. ఎలాంటి అవాంఛనీయ ఘటనలకు తావులేకుండా అధికార యంత్రాంగం అప్రమత్తంగా వ్యవహరిస్తోంది.

వైద్య సిబ్బంది, వాలంటీర్ల సేవలు
జాతర ప్రాంగణం అంతటా వైద్య బృందాలు నిరంతరం సేవలందిస్తుండగా, అత్యవసర చికిత్స కోసం ప్రత్యేక కేంద్రాలు ఏర్పాటు చేశారు. క్యూ లైన్ల వద్ద, గద్దెల సమీపంలో వాలంటీర్లు భక్తులకు నీరు, సూచనలు అందిస్తూ సహకరిస్తున్నారు. భక్తుల రద్దీని తట్టుకునేలా అన్ని విభాగాలు సమన్వయంతో పనిచేస్తున్నాయి.

ఎన్.ఎస్.ఎస్. వాలంటీర్లు
మేడారం జాతరలో వరంగల్ కాకతీయ విశ్వవిద్యాలయం నుంచి 500 మంది ఎన్.ఎస్.ఎస్. వాలంటీర్లు సేవలందిస్తున్నారు. జాతరలో భక్తులకు మార్గనిర్దేశం, క్యూ లైన్లలో సహాయం, జంపన్న వాగు వద్ద భద్రతా సూచనలు, తప్పిపోయిన భక్తులను శిబిరాలకు చేర్చడం వంటి సేవలతో కీలక పాత్ర పోషిస్తున్నారు.

ప్రముఖుల సందర్శనం
పలువురు ప్రముఖులు సమ్మక్క–సారలమ్మ తల్లులను దర్శించుకుని మొక్కులు సమర్పించారు.
తెలంగాణ రాష్ట్ర గవర్నర్ జిష్ణు దేవ్ వర్మ, మాజీ గవర్నర్ బండారు దత్తాత్రేయ, మంత్రులు సీతక్క, కొండా సురేఖ, మహబూబాబాద్ ఎంపీ పోరిక బలరాం నాయక్, ఎమ్మెల్సీ బసవరాజు సారయ్య, ఎమ్మెల్యేలు నాయిని రాజేందర్ రెడ్డి, పాయం వెంకటేశ్వర్లు, గండ్ర సత్యనారాయణ, డీజీపీ శివధర్ రెడ్డి, బ్రిటిష్ డిప్యూటీ హై కమిషన్ గ్యారత్ వెన్ ఓవెన్ సమ్మక్క–సారలమ్మలకు తులాభారం సమర్పించి దర్శించి, మొక్కులు చెల్లించుకున్నారు.

భక్తుల ప్రశంసలు
ప్రభుత్వం కల్పించిన సౌకర్యాలపై భక్తులు సంతృప్తి వ్యక్తం చేస్తున్నారు. గత జాతరలతో పోలిస్తే ఈసారి దర్శనాలు మరింత సులభంగా, వేగంగా జరుగుతున్నాయని, భద్రత, పారిశుధ్యం, వైద్య సేవలు మెరుగ్గా ఉన్నాయని భక్తులు ప్రశంసిస్తున్నారు.