డ్రగ్స్ విక్రయం – సాఫ్ట్వేర్ ఇంజినీర్ అరెస్టు

జీతం సరిపోవడం లేదనే కారణంతో ఓ సాఫ్ట్వేర్ ఇంజినీర్ డ్రగ్స్ విక్రయానికి పాల్పడిన సంఘటన సంచలనం సృష్టించింది. 35 ఏళ్ల హర్జత్ సింగ్, జమ్మూ ప్రాంతానికి చెందిన వ్యక్తి, హైదరాబాద్‌లో సాఫ్ట్వేర్ ఇంజినీర్‌గా పని చేస్తూ డ్రగ్స్ సరఫరా చేస్తున్నాడు.డ్రగ్స్‌కు బానిసైన హర్జత్, తన జీతం మొత్తం ఆ వ్యసనానికి ఖర్చు చేయడంతో, అదనపు డబ్బు కోసం డ్రగ్స్ విక్రయానికి దిగాడు. మహారాష్ట్రలోని పుణె నుంచి 120 మిల్లీగ్రాముల ఎండీఎంఎ క్రిస్టల్స్‌ డ్రగ్స్‌ను తెచ్చి హైదరాబాద్‌లో విక్రయించేందుకు ప్రయత్నిస్తున్న అతడిని సంగారెడ్డి డీటీఎఫ్, ఎక్సైజ్ పోలీసులు మల్కాపూర్ ఫ్లైఓవర్ వద్ద తనిఖీల సందర్భంగా పట్టుకున్నారు. తనతోటి ఉద్యోగులకు డ్రగ్స్ సరఫరా చేస్తున్నట్టు హర్జత్‌ అంగీకరించాడు. పోలీసులు అతడి నుండి డ్రగ్స్ స్వాధీనం చేసుకొని, మరింత విచారణ కొనసాగిస్తున్నారు. ఈ ఘటన సాఫ్ట్వేర్ రంగంలో పెరుగుతున్న డ్రగ్స్ వినియోగంపై ఆందోళన రేకెత్తించింది.