ఉమ్మడి పశ్చిమ గోదావరి జిల్లాలో పౌల్ట్రీ రైతులను తీవ్రంగా కలవరపెడుతున్న సమస్య మొదలైంది. అంతుచిక్కని వైరస్ కారణంగా వేల సంఖ్యలో కోళ్లు ఆకస్మికంగా మరణిస్తున్నాయి. గతేడాది డిసెంబర్ నుంచి ఈ వైరస్ ప్రభావం కనిపించడం ప్రారంభమై, సంక్రాంతి తర్వాత మరింత తీవ్రరూపం దాల్చిందని రైతులు చెబుతున్నారు.
వైరస్ వ్యాప్తితో కోళ్ల మరణాలు
ఆరోగ్యంగా కనిపిస్తున్న కోళ్లు ఒక్కసారిగా గంటల వ్యవధిలోనే చనిపోతుండటంతో రైతులు తీవ్రంగా నష్టపోతున్నారు. కోళ్లకు వ్యాక్సిన్ వేసినా ఫలితం లేకుండా పోతుందని, ఈ వైరస్ చికిత్సకు అంతుచిక్కడం లేదని రైతులు వాపోతున్నారు.
హెచ్1ఎన్5 అనుమానం – నమూనాల పరీక్షలు
స్థానిక వెటర్నరీ వైద్యులు కోళ్లలో హెచ్1ఎన్5 వైరస్ లక్షణాలు ఉన్నట్లు అనుమానిస్తున్నారు. 2012, 2020లోనూ ఇలాంటి సంఘటనలు జరిగాయని, అయితే ఈసారి వైరస్ మరింత వేగంగా వ్యాపిస్తోందని రైతులు ఆందోళన వ్యక్తం చేస్తున్నారు. వైరస్ వ్యాప్తికి కారణాలు తెలుసుకునేందుకు చనిపోయిన కోళ్ల నమూనాలను భోపాల్కు పరీక్షల కోసం పంపించారు. నివేదిక రాగానే వైరస్ అసలు స్వరూపం బయటపడనుంది.
తెలంగాణలోనూ ప్రభావం – కోట్లు నష్టాల్లో రైతులు
వైరస్ ప్రభావం పొరుగు రాష్ట్రం తెలంగాణ లోనూ కనిపిస్తోంది. కోళ్ల మరణాలతో రైతులు కోట్ల రూపాయల నష్టాన్ని ఎదుర్కొంటున్నారు. ఉంగుటూరు మండలానికి చెందిన నాగేశ్వరరావు అనే రైతు ఫారంలో 3,000 బ్రాయిలర్ కోళ్లు చనిపోగా, మరో రైతు వెంకట్రావు ఫారంలోనూ భారీ నష్టం సంభవించింది.
ప్రభుత్వం తక్షణమే జోక్యం చేసుకోవాలని రైతుల డిమాండ్
స్థానిక వెటర్నరీ అధికారులు అప్రమత్తమై, హైదరాబాద్ వెటర్నరీ పరిశోధన బృందానికి సమాచారం అందించారు. బృందం వచ్చి నమూనాలను సేకరించినా, ఇప్పటికీ వైరస్ కట్టడి చేయడానికి స్పష్టమైన చర్యలు కనిపించడం లేదని రైతులు వాపోతున్నారు. ఇప్పటికైనా ప్రభుత్వం వెంటనే స్పందించి తగిన చర్యలు తీసుకోవాలని, లేనిపక్షంలో కోళ్ల ఫారమ్ వ్యాపారం నష్టాల్లో కూరుకుపోతుందని వారు ఆందోళన వ్యక్తం చేస్తున్నారు.
