గిది యింటే తల్కాయె యేడ పెట్టుకోవాల్నో తెల్వదు! ఇగ సూత్తెనైతే గీ దేశంల పుట్టిన పతి ఒక్కలూ సిగ్గుతోని సచ్చిపోవాలె? గదేందో చెప్త ఇనుండ్లి.
గదే గా దిల్లీ పక్కన గుర్గాం అనే ఊరుంటది. దిల్లీకి గావల్సిన పాలు, పెరుగు, కాయగూరలన్నీ గానుంచే పోతయి. కూలోల్లు గూడ గీ నుంచే పోతరు. ఇగ గర్గాం లేకుంటే దిల్లీ లేనట్లే లెక్క! గుర్గాం కూలోడు కదల్కపోతే, దిల్లీల యే పొయ్యిల, పిల్లి గూడ లేవది.
గా గుర్గాంల సోమారం పొద్దుపొద్దగాల్నె… గా తెల్ల తోలోల్లు ఒకలిద్దరు మనోల్లతోని కల్సి ముర్కి పని చేసుకుంట కన్పించిండ్లు. సూటు, బూటేసుకున్నరు. మొకానికి గుడ్డలు కట్టిండ్లు. సేతులకు లబ్బర్లసొంటివేవో తొడుక్కుండ్లు. గిదేందని సూత్తె… గా సడక్ మీద పడ్డ సెత్త సెదారాన్ని యేరుతాండ్లు. ఎత్తేస్తాండ్లు. ముర్కి కాలువల్ని సాఫ్ జేస్తాండ్లు. ఇగ మన నారదమునులు… గదే, గా యిలేకర్లంటం గద. గవాళ్ళు ఊకుంటారు. ఇగ యీడియోలు దీసిండ్లు. గా పన్లు జేస్తున్నోలల్ల గా పొల్లను పట్టుకున్నరు. యెవలు మీరు? యేం జేస్తాండ్లు? గిదంతా ఎందుకు సాఫ్ జేస్తాండ్లు? అని దబ్బ దబ్బ అడిగిండ్లు. గప్పుడు గా ‘మటిల్డా’ యనే గా పొల్ల యేం సెప్పిందంటే… ‘మాది ప్రాన్స్ దేసం. నేను తొమ్మిదేండ్ల కానించి గీడ్నే గీ బారతదేసంల ఉంటున్న. ఇంకో రెండేండ్లుంట. గీ దేసం మస్తుగుంటది. గీ దేసమంటే నాకెంతో పానం. ఇట్టం. పేమ. అయితే గాడీడ కన్పించే గీ సెత్తే మస్తు సికాకు పెడ్తాంది. ముర్కి కాల్వలల్ల అంతా ముర్కే. నీళ్ళేడపోతానయి? యిశారంగుంది. యికారమన్పిస్తాంది.’ ఇగ గిదంత పనిగాదని ‘నేను మా దేసపోల్లను కూడగట్టిన. గీ ఊరోల్లు ఒకలిద్దరు ఒచ్చిండ్లు. గివన్నీ సాపు జేస్తానం. గిదంతా సాపు అయ్యేదాన్క సేత్తనే ఉంటమ’ని సెప్పింది. గాడికి ఊకోకుండ.. ‘నా గుర్గాం నాకు గర్వం, నా బాధ్యత’, ‘మీ యీది, మీ బాధ్యత’, ‘సెత్త వద్దు, మరిన్ని చెట్లు’ గావాల్నని రాసిపెట్టిన ‘అట్టముక్కలు’ పట్టుకొని మంచిగ యీడియోలకి, పోటోలకి పోజులిచ్చిండ్లు.
ఇగ కన్పించే గా సెత్తను, గావాల్లు పని జేసేది. గా పొల్ల మాట్లాంది, ‘అట్టముక్కలు’ పట్టకున్నది.. అంతా కలె గలిపి ఓ యీడియో జేసి, పోటోలు దీసి, గా ఎఎన్ఐ వోల్లు.. గ వాల్ల పేజీతోబాటు, ఎక్స్ కాతాల పెట్టిండ్లు. సూత్తాంటే లచ్చలచ్చల మంది సూత్తనే ఉండ్లు. సూసినోడు సూసి ఊకోక, ఏదో కామెంట్లు పెట్టబట్టిరి. ఒకగడనె గద.. ‘గీ గుర్గాంల మున్సిపాల్టోల్ల సెత్తదీసే పని సెత్తసెత్తగ ఉన్నద’న్నడు. మరొకడనె గద.. ‘గిది మన పబుత్వానికి, సడక్ ల మీద సెత్తేసే, పతి బారతీయునికి సిగ్గుసేట’న్నడు. ఇంకొకడనె గద.. ‘గిది సర్కారోనికి, మున్సిపాల్టోనికి ముక్కు మీద గుద్దిన’ట్టున్నదన్నడు. యింకో యింకొకడు అనె గద… ‘ఇది మన సెంప మీద సాచి కొట్టిన’టున్నదన్నడు. మరో ఇంకొకడు అనెగద..‘యెహె గిదీనికంటే సిగ్గుసేటు మరోటి లేదన్న’డు.
గదేదో దేసం గాని దేసం నుంచి వచ్చినోల్లకున్న ఇంగితం మనకు లేకపాయె. మనం మంచిగ ఉండాలనుకుంటం గనీ, మన సుట్టుముట్టు గూడ మంచిగుండాలని అనుకుంటానమా? యేడబడితే ఆడ సెత్తేత్తానం. అయిపాయె! మన సిగ్గు పాయె! మన దేసం పరువు పోయె!!
ఇగ గింత కంటే సిగ్గుదప్పిన ముచ్చట ఉంటాది. సడక్ ల మీద సెత్తేసేటోల్లు ఎవలైనా సిగ్గుపడాలె. ఇగ సెత్త ఎయ్యనే ఎయ్యమని పతిన బూనాలె. పతి ఒక్కలం పాటించాలె. పక్కోనికి సెప్పాలె. అందరికీ యినిపిస్తాందా?
