సత్వరమే కలెక్టర్ విచారణకు ఆదేశం
ముగ్గురు అంగన్ వాడీ టీచర్ల సస్పెండ్
యాదాద్రి భువనగిరి జిల్లాలో అంగన్వాడి అవినీతిపై అడుగు స్పెషల్ స్టోరీ
తెలంగాణ ప్రభుత్వం ప్రతిష్ఠాత్మకంగా ప్రవేశపెట్టిన పౌష్ఠిక ఆహారం పథకం, రాష్ట్రంలోని చిన్నారుల ఆరోగ్యాన్ని మెరుగుపరచడమే లక్ష్యంగా పనిచేస్తోంది. ఈ కార్యక్రమం కింద అంగన్వాడి కేంద్రాల ద్వారా చిన్నారులకు బాలామృతం, ఇతర పోషక ఆహారం అందించబడుతోంది. అయితే, యాదాద్రి భువనగిరి జిల్లా పలు ప్రాంతాల్లో పౌష్టిక ఆహారాన్ని అందించకుండా మాయం చేస్తున్నారని గత కొద్ది రోజులుగా ప్రచారం జరుగుతోంది. ఈ ప్రచారాన్ని నిజం చేస్తూ… ఆలేరు నియోజకవర్గం, ఆలేరు మండలం, మంతపుర్ అంగన్ వాడి, రాజపేట మండలం, పుత్తగూడెం అంగన్వాడి, తుంగతుర్తి నియోజకవర్గం, మోత్కూరు మండల కేంద్రంలో అంగన్వాడి కేంద్రాల్లో ఈ పథకంలో అవినీతి చోటుచేసుకోవడం యాదాద్రి భువనగిరి జిల్లా ప్రజలను ఆందోళనకు గురిచేసింది.
అవినీతి ఆరోపణలు
ఈ మూడు ప్రాంతాల్లో అంగన్వాడి టీచర్లు , చిన్నారులకు అందించాల్సిన బాలామృతం మరియు గుడ్లను పక్కదారి పట్టించి ఇతరులకు విక్రయిస్తున్నట్లు ఆరోపణలు. దీనితో పౌష్టికాహార పథకం అమలు కాకుండా, చిన్నారుల ఆరోగ్యం ప్రమాదంలో పడింది.
గత ప్రభుత్వంలోని నిర్లక్ష్యం
ఈ సమస్యను స్థానికులు పలు దఫాలు అధికారుల దృష్టికి తీసుకెళ్లినప్పటికీ, గత ప్రభుత్వంలో నుండి ఎలాంటి చర్యలు తీసుకోలేదు. ప్రజల వినతులు, ఫిర్యాదులు కనీసం పరిశీలించబడకపోవడం వల్ల అవినీతి మరింతగా పెరిగింది.
కలెక్టర్ చొరవ
తాజాగా కలెక్టర్ గా బాధ్యతలు చేపట్టిన హనుమంతరావు ఈ విషయంపై ప్రతిసారి వినతులు రావడంతో ఈ అంశాన్ని సీరియస్గా తీసుకున్నారు. జిల్లాలో జరిగిన అవినీతి ఘటనపై సమగ్ర విచారణ చేపట్టారు. విచారణలో, పౌష్టిక ఆహారం సరఫరా ప్రక్రియలో అవకతవకలు జరిగినట్లు స్పష్టమైంది.
టీచర్ల సస్పెన్షన్
విచారణ రిపోర్టు ఆధారంగా, అవినీతిలో ప్రధాన పాత్ర పోషించిన అంగన్వాడి టీచర్లను తక్షణమే సస్పెండ్ చేశారు. పథకంపై నేరుగా ప్రభావం చూపే ఇటువంటి చర్యలపై మరింత దృష్టి సారించాలని కలెక్టర్ ఆదేశించారు.
ప్రజల హర్షం
కలెక్టర్ హనుమంతరావు తీసుకున్న నిర్ణయాలకు జిల్లా ప్రజలు అభినందనలు, హర్షం వ్యక్తం చేస్తున్నారు. చిన్నారుల ఆరోగ్యం, అభివృద్ధిని అడ్డుకొని అక్రమాలకు పాల్పడుతున్న వారికి ప్రభుత్వమే గట్టి సమాధానం ఇవ్వాలని ప్రజలు ఆకాంక్షిస్తున్నారు.
పౌష్టిక ఆహార పంపిణీలో పారదర్శకత
ఈ సంఘటనల తర్వాత, పౌష్టిక ఆహార పంపిణీలో పారదర్శకతను పెంచేందుకు, ప్రతి అంగన్వాడి కేంద్రాన్ని పర్యవేక్షించేందుకు ప్రత్యేక బృందాలను ఏర్పాటు చేయాలని ప్రజలు సూచిస్తున్నారు. ప్రభుత్వ కార్యాచరణలో ఈ అంశాలను చేర్చడం ద్వారా, పథకాలు నిజమైన లబ్ధిదారులకు చేరుతాయి.
