హైదరాబాద్ మేడ్చల్లోని సీఎంఆర్ ఇంజినీరింగ్ కాలేజ్ గర్ల్స్ హాస్టల్ వద్ద గత రాత్రి నుండి ఉద్రిక్తత చోటుచేసుకుంది. హాస్టల్ బాత్రూంలో మొబైల్తో వీడియోలు తీశారనే ఆరోపణలతో విద్యార్థినులు ఆందోళన వ్యక్తం చేశారు. ఈ విషయంపై విద్యార్థి సంఘాల నాయకులు స్పందించి హాస్టల్ వద్ద పెద్ద ఎత్తున నిరసనలు చేపట్టారు. విద్యార్థినులు చేసిన ఆరోపణల ప్రకారం, వంట సిబ్బందే వీడియోలు తీశారని అనుమానిస్తున్నారు.
ఇది తెలియగానే కాలేజీ యాజమాన్యంపై విమర్శలు వెల్లువెత్తాయి. విద్యార్థుల డిమాండ్ మేరకు పోలీసులు 15 మంది వంట సిబ్బందిని అదుపులోకి తీసుకుని దర్యాప్తు ప్రారంభించారు. బాధ్యులపై చట్టపరమైన చర్యలు తీసుకోవాలని విద్యార్థినులు, వారి తల్లిదండ్రులు కోరుతున్నారు. ఈ ఘటనతో కాలేజీ యాజమాన్యం, హాస్టల్ నిర్వహణలో ఉన్న లోపాలు బయటపడ్డాయి.
పోలీసులు ఘటనపై సీరియస్గా స్పందించి నిజాలను వెలికితీసేందుకు చర్యలు తీసుకుంటున్నారు. విద్యార్థినుల భద్రత, గోప్యతకు సంబంధించిన ఈ విషయంలో నిష్పక్షపాతంగా విచారణ జరిపించాలని విద్యార్థి సంఘాలు డిమాండ్ చేస్తున్నాయి.
