2008లో జరిగిన 26/11 ముంబయి ఉగ్రదాడులు ఇప్పటికీ దేశాన్ని జ్ఞాపకాలతో గడగడలాడిస్తున్నాయి. ఈ దాడుల కీలక సూత్రధారుల్లో ఒకరైన తహవూర్ రాణాను భారత్‌కు అప్పగించేందుకు అమెరికా సుప్రీంకోర్టు గ్రీన్ సిగ్నల్ ఇచ్చింది.
తహవూర్ రాణా తనను భారత్‌కు అప్పగించవద్దంటూ అమెరికాలోని అనేక కోర్టులను ఆశ్రయించినప్పటికీ, ఇటీవల ఆయన రివ్యూ పిటిషన్‌ను అమెరికా సుప్రీంకోర్టు కొట్టివేసింది. దీనితో భారత్‌కు రాణాను అప్పగించేందుకు మార్గం సుగమమైంది. ప్రస్తుతం ఆయన లాస్ ఏంజెల్స్ డిటెన్షన్ సెంటర్‌లో ఉన్నారు.
పాకిస్థాన్‌లో జన్మించిన రాణా, కెనడాలో పెరిగాడు. 26/11 ఉగ్రదాడుల్లో రాణా పాత్ర చాలా కీలకమని దర్యాప్తులో తేలింది. లష్కరే తోయిబా ఉగ్రవాది డేవిడ్ హెడ్లీతో రాణాకు ఉన్న సంబంధాలు, దాడులకు ముందు హెడ్లీ రూపొందించిన బ్లూప్రింట్‌లో రాణా హస్తం ఉందని పోలీసులు తెలిపారు.
2008 నవంబర్ 26న జరిగిన ఈ ఉగ్రదాడుల్లో 166 మంది ప్రాణాలు కోల్పోగా, వారిలో ఆరుగురు విదేశీయులు కూడా ఉన్నారు. పాకిస్థాన్‌కు చెందిన 10 మంది ఉగ్రవాదులు ముంబయిలో 60 గంటలపాటు భీకర దాడికి పాల్పడారు. తహవూర్ రాణాను భారత్‌కు రప్పించి దర్యాప్తు కొనసాగించేందుకు భారత ప్రభుత్వం అనేక సంవత్సరాలుగా కృషి చేస్తోంది.
