20 ఏళ్ల తర్వాత రీ-ఎంట్రీ ఇచ్చిన ‘మన్మథుడు’ నటి అన్షు

తెలుగు ప్రేక్షకులకు ‘మన్మథుడు’ సినిమాతో పరిచయమైన నటి అన్షు అంబానీ, దాదాపు 20 ఏళ్ల తర్వాత సినిమాల్లోకి మళ్లీ ప్రవేశించారు. ఆమె తాజా చిత్రం ‘మజాకా’, ఫిబ్రవరి 26న విడుదలకు సిద్ధమైంది. ఇటీవల ఓ ఇంటర్వ్యూలో అన్షు, తాను ఇన్నేళ్లు ఇండస్ట్రీకి దూరంగా ఉన్న కారణాలను వెల్లడించారు. చిన్న వయస్సులోనే ‘మన్మథుడు’, ‘రాఘవేంద్ర’, ‘మిస్సమ్మ’ చిత్రాల్లో నటించినా, యాక్టింగ్‌ను కెరీర్‌గా తీసుకోలేదని, చదువుల మీదే దృష్టి పెట్టిందని చెప్పారు. తర్వాత లండన్ వెళ్లి సైకాలజీలో విద్యను పూర్తి చేసి థెరపిస్ట్‌గా పనిచేశారు. 25 ఏళ్లకే పెళ్లి చేసుకొని, ఇద్దరు పిల్లలను చూసుకుంటూ కుటుంబ జీవితం గడిపారు. 2023లో ‘మన్మథుడు’ రీ-రిలీజ్ సందర్భంగా ప్రేక్షకుల స్పందన చూసి మళ్లీ సినిమాల్లోకి రావాలని నిర్ణయించుకున్నారు. ‘మజాకా’లో తన పాత్రకు మంచి ప్రాధాన్యం ఉందని, 60 రోజులు షూటింగ్‌లో పాల్గొన్నానని చెప్పారు. భాషాపరమైన సమస్యలు ఎదురైనా, ప్రస్తుతం తెలుగు నేర్చుకుంటున్నట్లు తెలిపారు. తన తండ్రి ఆశీర్వాదం వల్లే మళ్లీ సినీ పరిశ్రమలోకి వచ్చానని భావిస్తున్నానని, కెమెరా ముందుకు రావడం ఆయనకు గర్వకారణమని అన్నారు. ఈసారి నటనలో మెరుగులు దిద్దుకుంటానని, ప్రేక్షకుల నుంచి సానుకూల స్పందన ఆశిస్తున్నట్లు పేర్కొన్నారు.