భవిష్యత్ కార్యాచరణపై దానం నాగేందర్ ఇంట్లో సమావేశం

ఫిరాయింపు ఎమ్మెల్యేలు ప్రభుత్వ సలహాదారు వేం నరేందర్ రెడ్డితో భేటీ అయిన తర్వాత, మంత్రి దానం నాగేందర్ నివాసంలో సమావేశమయ్యారు. స్పీకర్ కార్యాలయం నుంచి వచ్చిన నోటీసులపై ఎలా స్పందించాలన్న దానిపై ఈ సమావేశంలో ప్రధానంగా చర్చించినట్టు తెలుస్తోంది. న్యాయపరంగా ఏ మార్గాన్ని అనుసరించాలి, అసెంబ్లీ సెక్రటరీ ఇచ్చిన నోటీసులకు ఏ విధంగా సమాధానం ఇవ్వాలి అనే విషయాలపై ఎమ్మెల్యేలు చర్చిస్తున్నారు. అలాగే, ఈ వ్యవహారంపై సుప్రీంకోర్టుకు వెళ్లే అవకాశాలపై కూడా వారు సమాలోచనలు జరుపుతున్నారని సమాచారం. మరోవైపు, ఎమ్మెల్యేలు త్వరలోనే ఢిల్లీకి వెళ్లే ఆలోచనలో ఉన్నట్టు తెలుస్తోంది. రాజకీయ పరిణామాలు వేగంగా మారుతున్న నేపథ్యంలో ఈ సమావేశానికి ప్రాధాన్యత ఏర్పడింది. ఫిరాయింపు ఎమ్మెల్యేల భవిష్యత్ కార్యాచరణపై త్వరలోనే స్పష్టత వచ్చే అవకాశం ఉంది.