ఫార్ములా-ఈ కార్ రేసు కేసులో సంచలన పరిణామం చోటు చేసుకుంది. ఈ కేసు దర్యాప్తు వేగవంతం చేస్తూ, బీఆర్ఎస్ వర్కింగ్ ప్రెసిడెంట్, మాజీ మంత్రి కల్వకుంట్ల తారక రామారావు (కేటీఆర్) నివాసంలో అవినీతి నిరోధక శాఖ (ఏసీబీ) అధికారులు సోదాలు నిర్వహించారు. గచ్చిబౌలిలోని ఓరియన్ విల్లాస్లో శుక్రవారం సాయంత్రం ఈ తనిఖీలు ప్రారంభమయ్యాయి. ఈ నెల 2న కేటీఆర్కు ఏసీబీ నోటీసులు జారీ చేసిన సంగతి తెలిసిందే. నోటీసుల ప్రకారం ఇవాళ విచారణకు హాజరయ్యేందుకు కేటీఆర్ ఏసీబీ కార్యాలయానికి వెళ్లారు. అయితే, తన న్యాయవాదితో కలిసి విచారణకు హాజరు కావాలన్న ఆయన అభ్యర్థనను అధికారులు తిరస్కరించారు.
ఈ నేపథ్యంలో కేటీఆర్ తన వివరణతో కూడిన లేఖను ఏసీబీ అధికారులకు అందజేసి అక్కడి నుంచి వెళ్లిపోయారు. ఆ తర్వాత కేటీఆర్ తన ఇంట్లో ఏసీబీ సోదాలు జరిగే అవకాశం ఉందని మీడియాకు వెల్లడించారు. ఆయన చెప్పినట్లుగానే సాయంత్రానికి సోదాలు ప్రారంభమవ్వడం రాజకీయ వర్గాల్లో హాట్ టాపిక్గా మారింది. ఫార్ములా-ఈ కేసు సంబంధిత కీలక డాక్యుమెంట్లు, ఆధారాలు సేకరించే ఉద్దేశ్యంతో ఈ సోదాలు నిర్వహించారని సమాచారం.
అదేవిధంగా, ఏసీబీ అధికారులు కేటీఆర్కు మరోసారి నోటీసులు జారీ చేశారు. ఈ నెల 9న తిరిగి విచారణకు హాజరుకావాలని ఆదేశించారు. తనపై ఉన్న ఆరోపణలు రాజకీయ ఉద్దేశాలతో ప్రేరేపితమని, విచారణకు పూర్తిగా సహకరించేందుకు తాను సిద్ధంగా ఉన్నానని కేటీఆర్ మీడియాతో స్పష్టం చేశారు. ఈ ఘటన ప్రస్తుతం రాష్ట్ర రాజకీయాలలో కలకలం రేపుతుండగా, ఫార్ములా-ఈ కేసు విచారణకు సంబంధించి మరింత సమాచారం వెలుగులోకి వచ్చే అవకాశం ఉంది.
